Qytaı bıligi Shansıdegi shahta jarylysyna qatysty qatań tergeý júrgizetinin málimdedi
ASTANA. KAZINFORM — Qytaı Memlekettik keńesi Shansıdegi shahtadaǵy jarylysqa qatysty qatań tergeý júrgizýge ýáde berdi. Bul týraly Sınhýa agenttigi habarlady.
Qytaı Halyq Respýblıkasynyń Memlekettik keńesi jibergen tergeý toby Shansı provıntsııasyndaǵy kómir shahtasynda bolǵan adam ólimine ákelgen gaz jarylysyna qatysty qatań ári ymyrasyz tergeý júrgiziletinin málimdedi.
22 mamyr kúni Tsınıýan ýezindegi «Lıýshenıýı» shahtasynda bolǵan apat saldarynan 82 adam qaza taýyp, taǵy toǵyz adam iz-túzsiz joǵalyp ketken.
Tergeý toby apattyń sebepterin jan-jaqty zerdelep, jergilikti bılik organdarynyń, salalyq retteýshi mekemelerdiń jáne qatysy bar kásiporynnyń jaýapkershilik deńgeıin anyqtaıtynyn habarlady. Sondaı-aq zańnamaǵa sáıkes qatań jazalaý sharalary qoldanylatyny aıtyldy.
Sonymen qatar top jergilikti bılikke shahtalardaǵy eńbek qaýipsizdigin muqııat tekserýdi, zańsyz árekettermen batyl kúresýdi, qaýipsizdik monıtorıngi derekterin burmalaý, jer astyndaǵy jumysshylar esebin durys júrgizbeý, sondaı-aq zańsyz qosalqy merdigerlik pen jalǵa berý tájirıbeleriniń jolyn kesýdi tapsyrdy.
Aıta ketelik Memleket basshysy QHR tóraǵasyna kóńil aıtý jedelhatyn joldaǵan edi.
