Qytaı «Beıdoý» spýtnıktik navıgatsııa júıesin jańartty
ASTANA. KAZINFORM — Qytaıdyń «Beıdoý» spýtnıktik navıgatsııa júıesi orbıtada jańartylyp, sonyń nátıjesinde paıdalanýshylarǵa kórsetiletin qyzmet sapasy jaqsardy. Bul týraly Qytaıdyń spýtnıktik navıgatsııa jónindegi basqarmasy málimdedi, dep habarlaıdy Kazinform agenttigi Sınhýaǵa silteme jasap.
CSNO málimetinshe, Qytaı aldaǵy ýaqytta «Beıdoý» júıesiniń turaqty jumysyn qamtamasyz etip qana qoımaı, jańa býyn navıgatsııalyq tehnologııalardy damytýǵa da basymdyq beredi. Sonyń nátıjesinde álemniń kez kelgen núktesindegi paıdalanýshylarǵa ornalasqan ornyn anyqtaý, navıgatsııa jáne ýaqytty sınhrondaý boıynsha anaǵurlym senimdi qyzmet usynýǵa múmkindik beredi.
«Beıdoý» – tolyqqandy jumys isteıtin, ónimdiligi joǵary jahandyq spýtnıktik navıgatsııa júıesi. Qazir onyń orbıtasynda 50 jumys istep turǵan spýtnık bar. Júıe ornalasqan oryndy 10 metrge deıingi dáldikpen anyqtap, jyldamdyqty sekýndyna 0,2 metrge deıingi dáldikpen ólsheıdi. Sondaı-aq ýaqytty sınhrondaý dáldigi 20 nanosekýndqa deıin jetedi.
Sonymen qatar PPP (Precise Point Positioning) — joǵary dáldiktegi núktelik pozıtsııalaý qyzmetiniń arqasynda «Beıdoý» júıesi kóldeneń baǵytta 0,3 metrge deıin, al tik baǵytta 0,6 metrge deıin dáldikpen ornalasqan oryndy anyqtaı alady.
CSNO málimetinshe, bul júıe Qytaıdyń ekonomıkasy men qoǵamdyq ómirine keńinen engizilgen. Qazirgi tańda ol paıdalanýshylarǵa joǵary dáldiktegi pozıtsııalaý, navıgatsııa jáne ýaqytty sınhrondaý qyzmetterin turaqty túrde usynyp keledi.
Eske salaıyq, buǵan deıin Qytaı kádimgi smartfon arqyly alǵashqy spýtnıktik qońyraý jasaǵanyn habarlaǵanbyz.
