Qytaı basylymdary Qasym-Jomart Toqaevtyń sapary týraly ne jazyp jatyr

Qytaıdyń ortalyq jáne halyqaralyq deńgeıdegi jetekshi medıa platformalary Memleket basshysynyń saparyn Qazaqstan men Qytaı arasyndaǵy jan-jaqty strategııalyq áriptestiktiń joǵary deńgeıiniń kórinisi retinde baǵalap, Prezıdenttiń jasandy ıntellekt salasyndaǵy halyqaralyq yntymaqtastyq jónindegi bastamalaryna erekshe nazar aýdardy.

Qytaı Kommýnıstik partııasy Ortalyq komıtetiniń resmı basylymy — «Jenmın jıbao» (人民日报) gazeti Qasym-Jomart Toqaevtyń QHR Tóraǵasy Sı Tszınpınmen kelissózderi týraly materıal jarııalady. Basylym Qazaqstan Prezıdentiniń Dúnıejúzilik jasandy ıntellekt konferentsııasyna qatysý úshin Qytaıǵa kelgenin atap ótip, eki el basshylarynyń qazaq-qytaı qarym-qatynastarynyń damý perspektıvalary jónindegi pikir almasýyna keńinen toqtalǵan.

«Jenmın jıbao» Qazaqstan men Qytaı arasyndaǵy máńgilik jan-jaqty strategııalyq áriptestiktiń turaqty damyp kele jatqanyn, sondaı-aq eki eldiń «altyn otyz jyldyqtyń» jańa kezeńin birlesip qalyptastyryp jatqanyn atap kórsetti.

Qytaıdyń bas memlekettik aqparat agenttigi — «Sınhýa» Prezıdenttiń saparyna arnalǵan birneshe maqala jarııalady. Agenttik Memleket basshysynyń Qytaıǵa saparynyń resmı baǵdarlamasyn, Qytaı basshysymen kelissózderin jáne Dúnıejúzilik jasandy ıntellekt konferentsııasyndaǵy sózin jan-jaqty qamtydy.

«Sınhýa» Qasym-Jomart Toqaevtyń óz sózinde Qazaqstannyń jasandy ıntellekt tehnologııalaryn damytýǵa jáne ony memlekettik basqarý, ónerkásip, kólik pen bilim berý salalaryna engizýge basymdyq berip otyrǵany jónindegi sózin keltirdi. Sondaı-aq basylym Prezıdenttiń halyqaralyq qaýymdastyqtyń jasandy ıntellekt salasyndaǵy yntymaqtastyǵyn nyǵaıtýǵa qatysty ustanymyna nazar aýdardy.

Qytaıdyń memlekettik teleradıo korporatsııasy — CCTV Memleket basshysynyń Dúnıejúzilik jasandy ıntellekt konferentsııasynyń ashylý saltanatyndaǵy sózinen arnaıy beınematerıaldar jarııalady. Qytaılyq aýdıtorııa Prezıdenttiń sóziniń qazaq jáne qytaı tilderindegi úzindilerimen tanysty.

Qytaıdyń iri halyqaralyq medıalarynyń biri — China News Service (中新社) áleýmettik jelilerdegi resmı paraqshalarynda Qasym-Jomart Toqaevtyń Qytaı Halyq Respýblıkasynyń Tóraǵasy Sı Tszınpınge qytaı tilinde alǵys bildirgen sátin bólisti. Beınematerıaldar az ýaqyt ishinde kóp qaralym jınap, áleýmettik jeli qoldanýshylary jyly pikir jazyp jatyr.

Sonymen qatar China News Service Prezıdenttiń Dúnıejúzilik jasandy ıntellekt konferentsııasyndaǵy sóziniń qytaı tilindegi kirispesin jeke beınerolık retinde jarııalady. Onda Memleket basshysy konferentsııany joǵary deńgeıde uıymdastyrǵany úshin alǵysyn bildirip, forýmnyń jahandyq jasandy ıntellekt salasyndaǵy dıalogty damytýdaǵy mańyzyn atap ótken.

Qytaıdyń halyqaralyq baǵyttaǵy Phoenix TV (凤凰卫视) telearnasy Qazaqstan Prezıdentiniń jasandy ıntellekt salasyndaǵy halyqaralyq yntymaqtastyq pen jahandyq basqarý máselelerine qatysty kózqarasyna keńinen toqtaldy. Arna Qazaqstannyń tsıfrlyq transformatsııa jáne jasandy ıntellektti damytý salasyndaǵy bastamalaryn atap ótti.

Al Gonkongtaǵy jetekshi qytaı tilindegi basylymdardyń biri — Wen Wei Po (文匯報) Prezıdenttiń Dúnıejúzilik jasandy ıntellekt konferentsııasyndaǵy baıandamasyn jarııalap, Qazaqstannyń jasandy ıntellekt tehnologııalaryn damytý strategııasyna jáne tsıfrlyq ekonomıkany ilgeriletý jónindegi josparlaryna nazar aýdardy.

Qytaılyq buqaralyq aqparat quraldarynyń materıaldarynda Qazaqstannyń jasandy ıntellekt salasyndaǵy halyqaralyq yntymaqtastyqty damytýǵa umtylysy, eldiń tsıfrlyq transformatsııa baǵytyndaǵy bastamalary jáne Qazaqstan men Qytaı arasyndaǵy joǵary deńgeıdegi saıası dıalogtyń qarqyndy damýy keńinen kórinis tapty.

Prezıdent Qasym-Jomart Toqaevtyń Qytaıǵa sapary Qytaı qoǵamynyń ǵana emes, halyqaralyq medıa keńistiktiń de nazaryn aýdaryp, Qazaqstannyń óńirlik jáne jahandyq deńgeıdegi mańyzdy bastamalaryna degen qyzyǵýshylyqtyń artyp kele jatqanyn kórsetti.

Eske salaıyq, buǵan deıin Memleket basshysy Qasym-Jomart Toqaev Dúnıejúzilik jasandy ıntellekt jónindegi konferentsııada sóz sóılegenin habarlaǵanbyz