Qytaı bankteri Reseımen saýdada qıyndyqqa ushyrady
ASTANA. KAZINFORM — Amerıka Qurama Shtattarynyń yqtımal qarjylyq sanktsııalaryna tap bolǵan Qytaıdyń iri bankteri Qytaı men Reseı arasyndaǵy tranzaktsııalardy tekserýdi kúsheıtip, Qytaı-Reseı iri saýda tapsyrystarynan bas tartty. Sondyqtan qytaılyq eksporttaýshylar shekaradaǵy shaǵyn bankter jáne astyrtyn qarjylandyrý arnalary arqyly esep aıyrysýǵa májbúr.
Reuters agenttiginiń habarlaýynsha, Reseı-Ýkraına soǵysy bastalǵannan beri AQSh Reseı men reseılik qurylymdarǵa birqatar sanktsııalar engizgen.
Endi AQSh Qytaıdyń bank sektoryna sanktsııa salýdy josparlap otyr. Sebebi, Vashıngton Qytaı Reseıdiń qorǵanys ónerkásibin qoldaıdy dep sanaıdy.
Reuters-niń aıtýynsha, Qytaıdyń Gýandýn provıntsııasynda ornalasqan elektr qurylǵylaryn óndirýshi kásiporynnyń ónimin Reseıge jóneltýde qıyndyq týdyrǵany atap ótildi, sebebi bul ónimde másele bolǵany emes, qytaılyq bankterdiń tranzaktsııa tólemderine shekteý qoıǵany.
Bul kompanııanyń negizin qalaýshy Van myrzanyń aıtýynsha, qazir iri bankterge Reseıden tólemderdi alý úshin birneshe aı qajet.
Sondyqtan olar Qytaı-Reseı shekarasyndaǵy aımaqtarda belsendi valıýta brokerlerin tólemderdi sheshý úshin paıdalaný múmkindigin qarastyryp jatqanyn aıtty.
Gýandýndaǵy elektronıka kompanııasynyń menedjeri Qytaıdyń barlyq iri bankteri naýryz aıynyń basynan beri Reseımen esep aıyrysýdy toqtatqanyn jetkizdi.
Al Tszıansý provıntsııasyndaǵy hımııalyq mashına jasaý kompanııasynyń Lıý esimdi qyzmetkeri Tszılın Hýnchýn aýyldyq kommertsııalyq bankinde esepshot ashý úshin úsh aı boıy kezekte turǵanyn aıtty.
Wall Street Journal osy aıdyń 22-si kúni osy máselemen tanys adamdarǵa silteme jasap, AQSh sanktsııa jobasyn ázirlep jatqanyn jáne keıbir qytaılyq bankterdi álemdik qarjy júıesinen shyǵaramyz dep qorqytqanyn habarlady.
Keıinirek Reuters agenttigi AQSh-tyń anonımdi sheneýnikterine silteme jasap, Amerıka Qurama Shtattary bastapqyda keıbir qytaılyq bankterge sanktsııa salýdy talqylaǵanyn, biraq mundaı sharalardy júzege asyrý josparyn áli jasamaǵanyn habarlady.
