Qytaı bala kútimi boıynsha sýbsıdııaǵa 12,6 mlrd dollar bóledi

ASTANA. KAZINFORM — Qytaı Qarjy mınıstrligi bıyl ortalyq bıýdjetten bala kútimi boıynsha sýbsıdııalardy tóleýge 90 mıllıard ıýan (shamamen 12,6 mıllıard AQSh dollary) bólinetinin málimdedi, dep habarlaıdy Sınhýa.

Ortalyq bıýdjetten bólinetin transferttik tólemder aıasynda qurylatyn bul baǵdarlama jergilikti bılik organdaryna jalpy tólem kóleminiń shamamen 90 paıyzyn jabýǵa múmkindik beredi.

Qytaı Halyq Respýblıkasynyń Densaýlyq saqtaý isteri jónindegi memlekettik komıtetiniń resmı ókili Van Haıdýnnyń aıtýynsha, bala kútimi boıynsha sýbsıdııalar tamyzdyń úshinshi onkúndiginen bastap Qytaıdyń búkil aýmaǵyna birtindep engiziledi. 31 tamyzǵa qaraı bul kómek barlyq óńirde tolyq qoljetimdi bolady dep kútilip otyr.

Onyń sózinshe, komıtet tıisti úkimettik organdarmen birlesip, bala kútimi boıynsha sýbsıdııa júıesin basqarý erejeleri men qarjy qorlaryn retteıtin qujattardy ázirlep jatyr.

Sonymen qatar jergilikti bılik óńirlik erekshelikterdi eskere otyryp, sýbsıdııany júzege asyrýdyń naqty josparlaryn jasap, qyzmetkerlerdi irikteý jáne oqytý jumystaryn júrgizýi tıis.

Qytaı jaqynda bala kútimine arnalǵan memlekettik sýbsıdııa júıesin engizetinin jarııalady. Bul — otbasylardy qoldaý jáne týý kórsetkishin arttyrýǵa baǵyttalǵan aýqymdy sharalardyń biri.

Baǵdarlama aıasynda 2025 jyldan bastap 3 jasqa deıingi ár balaǵa jyl saıyn 3 600 ıýan (shamamen 503 AQSh dollary) kóleminde tólem jasalady.

Bul sýbsıdııalar jeke tabys salyǵynan bosatylady jáne otbasynyń ne jeke adamnyń tabysy retinde eseptelmeıdi. ıAǵnı, eń tómengi kúnkóris deńgeıindegi nemese az qamtylǵan sanatqa jatatyn azamattardyń járdemaqy alýyna áser etpeıdi.