Qytaı Aıǵa ushar aldynda robot ıtterdi synaqtan ótkizip jatyr

 ASTANA. KAZINFORM - Qytaılyq ǵalymdar Aıdyń astaryndaǵy qabattardy zertteýge baǵyttalǵan daıyndyq aıasynda robottandyrylǵan ıtterdi synaqtan ótkizip jatyr, dep habarlaıdy South China Morning Post.

Bul qabattar bolashaqta tirshilik etýge qolaıly aımaq retinde qarastyrylyp otyr.

Beıjiń ýnıversıtetiniń Kompıýterlik ǵylymdar mektebiniń komandasy Aıdyń jerasty qabattaryn zertteý maqsatynda eki túrli robot úlgisin ázirlep, Qytaıdyń Heılýntszıan provıntsııasyndaǵy lava úńgirinde synaqtan ótkizdi.

Zertteý toby tańdaǵan synaq alańynyń geologııalyq qurylymy Aıdyń jerasty bederine barynsha uqsas. Robottar lıdar júıelerimen jabdyqtalǵan jáne ózdiginen júrip-turýǵa, karta qurýǵa, sondaı-aq úńgirlerdiń qurylymyn joǵary dáldikpen úsh ólshemde (3D) beıneleýge qabiletti.

Birinshi robot prototıpi qumyrsqa jegish janýarynyń beınesine uqsas etip jasalǵan jáne kúrdeli jaǵdaıda ártúrli tapsyrmalardy oryndaı alady. Ekinshi prototıp — salamandra ataýyn alǵan qurylǵy. Ol kedergilerge toly jerde erkin qozǵalyp, jergilikti aýmaqty zertteý úshin jasalǵan.

— Aıdyń betinde temperatýra táýligine 300 gradýs Tselsııge deıin aýytqıdy, bul kez kelgen qurylǵynyń jaǵdaıyna áser etedi. Al Aı astyndaǵy úńgirler salystyrmaly túrde turaqty klımatymen erekshelenedi. Bul jerlerde zertteý keshenderin ornalastyryp, bolashaqta adam turýǵa bolatyn stantsııalardy salýǵa múmkindik bar, — deıdi Beıjiń ýnıversıtetiniń ǵalymy Lı Tszıatsı.

Ǵalymdardyń aıtýynsha, joba aıasyndaǵy túpki maqsat — tereń ǵarysh keńistigin zertteýge arnalǵan, tolyqtaı Qytaıda jasalǵan avtonomdy robot ázirleý. Ol bolashaqta Aıda jáne Marsta ǵylymı mıssııalardy oryndaı alýy tıis.

Osyǵan deıin Qytaıda Aı topyraǵynan kirpish jasaýǵa arnalǵan apparat jasalǵany týraly jazdyq.