Qytaı Aıǵa adam qondyrý josparyn tanystyrdy
ASTANA. KAZINFORM – Qytaı Aıdy adamnyń qatysýymen zertteý baǵdarlamasy aıasynda «eki ret ushyrý, Aı orbıtasynda jaqyndasý jáne túıistirý» ádisin qoldanýdy josparlap otyr. Qazir Aıǵa adam qondyrýǵa daıyndyq jumystary josparly túrde júrip jatyr, dep habarlaıdy Sınhýa agenttigi.
Qytaıdyń adam qatysatyn ǵarysh baǵdarlamasy bas konstrýktorynyń orynbasary ári Aıdy zertteý baǵdarlamasynyń bas konstrýktory Van Sıan bul jospardy Beıjińde ótken adam qatysatyn ǵaryshtyq ushýlar jónindegi VII ǵylymı sımpozıýmda tanystyrdy.
Josparǵa sáıkes, eki zymyran Aıǵa qonýǵa arnalǵan «Lanıýe» modýlin jáne «Menchjoý» basqarylatyn ǵarysh kemesin Jer men Aı arasyndaǵy aýyspaly orbıtaǵa bólek-bólek shyǵarady. Odan keıin eki apparat Aı orbıtasynda jaqyndasyp, túıisedi. Ǵaryshkerler «Menchjoý» kemesinen «Lanıýe» qoný modýline aýysyp, Aı betine túsedi. Sol jerde ǵylymı-zertteý jumystaryn júrgizedi.
Van Sıannyń aıtýynsha, bul tásil Qytaıdyń qazirgi tehnıkalyq múmkindikteri men ınfraqurylymyna tolyq sáıkes keledi. Sondaı-aq ǵarysh kemesi men Aıǵa qoný modýlin bólek ázirleý apparattardy jasaýdy birizdendirýge jáne uzaq merzimdi kólik quraldary jelisin qalyptastyrýǵa múmkindik beredi.
Qazir negizgi ǵarysh apparattaryn – «Chanchjen-10» zymyran-tasyǵyshyn, «Menchjoý» basqarylatyn kemesin jáne «Lanıýe» qoný modýlin ázirleý jumystary turaqty ári sátti júrip jatyr.
Ol Aıǵa adam qondyrý men ony avtomatty apparattar arqyly zertteý mıssııalarynyń negizgi tehnologııalar, ınfraqurylym jáne kadrlyq qamtamasyz etý turǵysynan ortaq tustary kóp ekenin atap ótti. Sondaı-aq «Chane» Aıdy zertteý baǵdarlamasy aıasynda qol jetkizilgen nátıjeler adam qatysatyn mıssııany júzege asyrýǵa berik negiz bolatynyn aıtty.
Aıta keteıik, jýyrda Úndistannyń jańa býyn jerserigin ǵaryshqa ushyrǵany habarlandy.
