Qytaı avtokólik qaýipsizdigine qoıylatyn talapty qataıtpaq
ASTANA. KAZINFORM — Qytaı bıligi jańa kólikterdi óndirýge qatysty erejelerdi qataıtyp, qaýipsizdik pen ekologııalyq táýekelderdi azaıtý úshin avtomobıl kompanııalarynan naryqqa shyǵarar aldynda kólikke ornatylǵan jańa tehnologııalar men ınnovatsııalardy qatań synaqtan ótkizýdi talap etpek, dep habarlaıdy Kazinform agenttiginiń Beıjińdegi menshikti tilshisi.
QHR Ónerkásip jáne aqparattandyrý mınıstrligi men Naryqty retteý jónindegi memlekettik basqarmanyń basshylyǵymen tórt vedomstvo ázirlegen qujat jobasyna sáıkes, avtoóndirýshilerge kólik modelderin sertıfıkattaý jáne olardy memlekettik katalogqa engizý boıynsha jańa talaptar qoıylady.
Memlekettik organ ókilderi tehnologııalyq ınnovatsııalardyń jyldam damýy jáne jańa ónimderdi naryqqa shyǵarýdaǵy asyǵystyq saldarynan kólikter jetkilikti deńgeıde synaqtan ótpeı jatqanyn, bul tutynýshylar men qorshaǵan orta úshin jasyryn táýekelder týdyratynyn atap ótti.
2027 jyldyń 1 qańtarynan bastap avtoóndirýshiler ınnovatsııalyq júıelerdiń, atap aıtqanda, baǵdarlamalyq jáne apparattyq sheshimderdiń keńeıtilgen parametrlerin, sondaı-aq olardy senimdiligi, qorshaǵan ortaǵa beıimdelýi jáne beriktigi boıynsha egjeı-tegjeıli synaqtan ótkizý týraly esepterin usynýǵa mindetteledi.
Qazir satylyp jatqan modelderdiń joǵaryda atalǵan talaptar boıynsha qosymsha qaýipsizdik derekterin usyný úshin avtoóndirýshilerge 2027 jyldyń 1 shildesine deıin merzim beriledi. Eger synaq kezinde qurylymdyq aqaýlar anyqtalsa, kompanııalar óndiristi dereý toqtatyp, satylymǵa shyǵarylǵan kólikterdi keri qaıtarýy qajet.
Avtomobıl kompanııalaryna budan bylaı júrgizýshige kómek kórsetý júıeleri men avtopılot múmkindikteriniń jalǵan nemese ásire jarnamalaýǵa, jol erejesi buzylǵan jarnamalardy paıdalanýǵa tyıym salynady. Satyp alýshyǵa tehnologııalardyń shekteýleri týraly naqty aqparat berilýi tıis.
Bılik kútpegen ýaqytta zaýyttardy tekserýdi kúsheıtpek. Sondaı-aq krash-testilerdi beınege túsirýdi pysyqtaý talaptary qoıylyp, jalǵan esepterdi usynǵan kompanııalarǵa qatań sanktsııalar taǵaıyndalady, tipti olar saýda lıtsenzııalarynan birjolata aıyrylýy da múmkin.
Qujat jobasy jóninen qoǵamdyq talqylaý 2026 jyldyń 10 qarashasyna deıin jalǵasady.
Buǵan deıin Qytaı avtomobıl kompanııalaryna baǵany sáıkestendirý talabyn qoıǵan bolatyn.
Germanııanyń avtokólik ónerkásibi básekedegi ornyn joǵaltyp jatyr.
