Qytaı Aýstralııadan ımporttalatyn sıyr etine qosymsha baj salyǵyn engizedi
ASTANA. KAZINFORM — Qytaıdyń Saýda mınıstrligi senbiden bastap Aýstralııadan ımporttalatyn sıyr etine qoldanystaǵy tarıfterge qosymsha 55 paıyzdyq baj salyǵy engiziletinin málimdedi, dep habarlaıdy Sınhýa.
Qytaı 2026 jyldyń 1 qańtarynan bastap sıyr etiniń ımportyna qatysty qorǵaý sharalaryn engizgen bolatyn. Bul sharalar jekelegen elder úshin belgilengen kvotalar arqyly júzege asyrylady. Belgilengen kólemnen artyq ımporttalǵan ónimge qosymsha baj salyǵy salynady.
Erejege sáıkes, qandaı da bir eldiń eksport kólemi jyldyq kvotaǵa jetkennen keıingi úshinshi kúnnen bastap sol elden jetkiziletin sıyr etine 55 paıyz kóleminde qosymsha tarıf qoldanylady.
Mınıstrliktiń málimetinshe, 18 maýsymda Aýstralııadan ákelingen sıyr eti belgilengen kvotanyń 100 paıyzyna jetken.
Qytaı Saýda mınıstrligi men Bas keden basqarmasy eksporttaýshy eldiń sıyr eti kvotasy 50 jáne 80 paıyzǵa jetken kezde arnaıy habarlama joldaıdy. Al kvota tolyq ıgerilgen jaǵdaıda qosymsha tarıfterdiń engiziletini týraly resmı málimdeme jarııalanady.
Buǵan deıin Qytaı Afrıka elderinen baj salyǵyn alyp tastaıtynyn jazǵanbyz.
