Qytaı áýe kompanııasy Astana – Qulja baǵytyn ashýdy josparlap otyr
ASTANA. KAZINFORM – Astana halyqaralyq áýejaıynyń basshylyǵy men Qytaıdyń Urumqi Air áýe kompanııasynyń ókilderi Qazaqstan men Qytaı arasyndaǵy jańa halyqaralyq áýe qatynasyn damytý máselesin talqylady.
Kezdesýdiń negizgi taqyryptarynyń biri – Astana men Qulja qalalary arasynda turaqty áýe reısterin ashý boldy.
– Aldyn ala josparǵa sáıkes, reısterdi bıylǵy qyrkúıek aıynan bastap aptasyna 2–3 ret oryndaý kózdelip otyr, – delingen habarlamada.
Sonymen qatar Urumqi Air ókilderi Astana halyqaralyq áýejaıyn Eýropa baǵytyndaǵy reıster úshin tranzıttik avıatsııalyq hab retinde paıdalaný múmkindigine qyzyǵýshylyq bildirdi.
Taraptar halyqaralyq baǵyttar jelisin keńeıtý áleýetin, yntymaqtastyqtyń negizgi sharttaryn jáne halyqaralyq áýe qatynasyn odan ári damytý perspektıvalaryn talqylady.
Kezdesý barysynda jańa baǵytta paıdalanylýy josparlanǵan áýe kemesine de erekshe nazar aýdaryldy.
– Áńgime Qytaıda óndirilgen zamanaýı óńirlik jolaýshylar ushaǵy – Comac C909 týraly bolyp otyr. Reıster iske qosylǵan jaǵdaıda, bul áýe kemesi alǵash ret Astana halyqaralyq áýejaıyna turaqty reıster oryndaıtyn bolady, – dep málim etti áýejaıdyń baspasóz qyzmeti.
Vedomstvonyń málimetinshe, Astana halyqaralyq áýejaıy halyqaralyq baǵyttar sanyn kóbeıtý, sheteldik áýe kompanııalarymen yntymaqtastyqty nyǵaıtý jáne jolaýshylar men tranzıttik tasymaldy damytý jumystaryn jalǵastyryp keledi.
Urumqi Air 2014 jyly qurylǵan. Kompanııanyń negizgi bazasy Qytaıdyń Shyńjań Uıǵyr avtonomııalyq aýdanyndaǵy Úrimji qalasynda ornalasqan. Áýe kompanııasy ishki jáne halyqaralyq baǵyttar boıynsha 50-den astam reıs oryndaıdy. Onyń áýe parkinde 15 ushaq bar, onyń ishinde Boeing 737 jáne Comac C909 áýe kemeleri paıdalanylady.
Aıta keteıik, túrkııalyq áýe kompanııa da Qazaqstanǵa tikeleı reıster ashady.
