Qytaı astanasynda mamyrdan bastap drondarǵa tolyq tyıym salynady

ASTANA. KAZINFORM — Beıjiń qalasy ákimdiginiń resmı saıtynda jarııalanǵan málimetke sáıkes, «Beıjiń qalasynda pılotsyz ushý apparattaryn basqarý týraly ereje» 2026 jylǵy 1 mamyrdan bastap kúshine enedi.

Jańa talapqa saı, Beıjiń qalasynyń búkil aýmaǵy drondar úshin baqylaýdaǵy aımaq dep belgilenip, ashyq keńistikte ushyrý úshin aldyn ala ruqsat alý mindetteledi.

Qujatqa sáıkes, qala aýmaǵynda — meıli ol saıabaq, týrıstik oryn nemese qala syrtyndaǵy ashyq alań bolsyn — arnaıy ruqsatsyz dron ushyrýǵa bolmaıdy.

Sondaı-aq jańa erejede drondar men olardyń negizgi bólshekterin Beıjińge alyp kirýge de tyıym salynǵan. Bul talap poıyzben, ushaqpen, avtobýspen nemese jeke kólikpen keletin barlyq azamatqa qatysty. Eger bireý drondy qala syrtyna alyp shyǵyp, keıin qaıta kirgizgisi kelse, aldyn ala polıtsııa organdary arqyly aqparattyq tekserýden ótýi qajet.

Taǵy bir mańyzdy ózgeris — Beıjiń aýmaǵynda drondar men olardyń bólshekterin satýǵa nemese jalǵa berýge tolyq tyıym salynady. Bul talap tek dúkenderge ǵana emes, onlaın saýda platformalaryna da qatysty. Erekshe jaǵdaılarda ǵana, qaýipsizdik tekserisinen ótkennen keıin arnaıy ruqsat berilýi múmkin.

BAQ málimetinshe, osy ózgeristerge baılanysty DJI kompanııasy 1 mamyrǵa deıin Beıjiń naryǵynan dron ónimderin tolyq alyp tastaýdy josparlap otyr. Osydan keıin qalada dron satyp alý nemese jetkizý múmkin bolmaıdy.

Beıjiń qala ákimdigi bul sharalardy tómengi áýe keńistigindegi qaýipsizdikti kúsheıtýge jáne drondardy paıdalanýdy retteýge baǵyttalǵan dep málimdeıdi. Al mamyr merekeleri jaqyndap kele jatqanyn eskergen bılik ókilderi azamattardy sapar aldynda dron qoldanýǵa qatysty talaptardy aldyn ala tekserip, zań buzýshylyqqa jol bermeýge shaqyrady.

Osyǵan deıin Qytaıda bastaýysh jáne orta mektep oqýshylarynyń jartysynan kóbi jasandy ıntellektti paıdalanatynyn jazdyq.