Qytaı astanasynda qazaq tilin meńgergen sheteldikter óz sheberligin kórsetti
Qytaıdaǵy Qazaqstan Mádenıet ortalyǵynda, Qazaqstan Respýblıkasynyń Qytaı Halyq Respýblıkasyndaǵy elshiliginiń qoldaýymen, 6 jeltoqsanda sheteldikter arasynda qazaq tilin bilýge arnalǵan úshinshi jyl saıynǵy halyqaralyq konkýrs ótti, dep habarlaıdy Kazinform agenttiginiń menshikti tilshisi.
Baıqaýǵa Pekın til jáne mádenıet ýnıversıtetiniń, Dalıan shet tilder ýnıversıtetiniń stýdentteri, sondaı-aq Qytaı azamattary arasyndaǵy qazaq tilin úırenip júrgender qatysty.
Qatysýshylar Qytaı, Ońtústik Koreıa, Reseı, Taıland jáne Japonııa elderinen kelgen. Qonaqtar qatarynda ǵylymı jáne bilim berý mekemeleriniń ókilderi, dıplomattar jáne qazaqstandyq stýdentter boldy.
Іs-sharanyń basynda qatysýshylardy Qazaqstan Respýblıkasynyń Qytaıdaǵy elshiliginiń keńesshisi Asqar Shalqarbaev quttyqtap, sóz sóıledi. Qytaı tarapynan Pekın shet tilder ýnıversıtetindegi Qazaqstandy zertteý ortalyǵynyń basshysy Sýn Fan jáne Dalıan shet tilder ýnıversıtetiniń oqytýshysy Loý Iıhýa sóz sóıledi.
Spıkerler Qazaqstannyń memlekettik tilin úırenýge degen qyzyǵýshylyqtyń artyp kele jatqanyn jáne mádenıetaralyq ózara is-qımyldy nyǵaıtý úshin osyndaı bastamalardyń mańyzdylyǵyn atap ótti.
Baıqaý baǵdarlamasyna qatysýshylarmen tanysý, suraqtarǵa jaýaptar, zııatkerlik tapsyrmalar jáne shyǵarmashylyq qoıylymdar kirdi. Baıqaýǵa qatysqandar qazaqtyń belgili aqyndarynyń óleńderin mánerlep oqyp, memlekettik Ánurandy jáne Qazaqstannyń tanymal ánderin oryndady, mýltfılmderdi dybystap kórdi.
Uıymdastyrýshylar barlyq qatysýshynyń qazaq tilin jáne mádenıetin tereń meńgergenin jáne shynaıy qyzyǵýshylyq tanytqanyn atap ótti. Baıqaý nátıjesi boıynsha birinshi jáne ekinshi oryn Dalıan shet tilder ýnıversıtetiniń stýdentteri Gýan Haonan men Jý Syı enshiledi. Úshinshi qurmetti oryn bes adam arasynda bólindi. Jeńimpazdar men barlyq qatysýshy gramotalarmen jáne estelik syılyqtarmen marapattaldy.
Konkýrs aıaqtalǵannan keıin Kazinform tilshisi ádilqazy músheleri men qatysýshylarmen suhbattasyp, olardyń shara týraly áserleri, qazaq tilin úırenýge ne túrtki bolǵanyn jáne til úırený protsesinde qandaı qıyndyqtarǵa tap bolǵanyn surap bildi.
Pekın shet tilder ýnıversıtetiniń qazaq tiliniń oqytýshysy Sholpan atty qatysýshy Almatyda segiz jyl boıy qazaq tilin oqyǵanyn aıtyp berdi. Onyń aıtýynsha, qatysýshylardyń qazaq tilin bilý deńgeıi óte joǵary bolǵan.
— Meni ásirese qatysýshylardyń ártúrliligi men jas erekshelikteri tańǵaldyrdy. Buryn baıqaýǵa negizinen qytaılyq stýdentter qatysatyn, al búgin biz ártúrli elder ókilderin kóremiz, eń úlken qatysýshynyń jasy 62-de, — dedi ol.
62 jastaǵy baıqaýshy Lıý Sıaolan eshkimniń kómeginsiz ózi daıyndalyp, memlekettik Ánurandy áserli oryndaýymen erekshe kózge tústi.
— Men hımıkpin, ótken jyly zeınetkerlikke shyqtym. Qazaq tilin 2020 jyly Dımash Qudaıbergenniń ánderin alǵash estigende úırenýge kiristim. Sol kezde oqý quraldaryn satyp aldym, sodan sabaqqa kiristim, sebebi maǵan bul til shynymen unady, — dedi ol.
— Tilge degen súıispenshilik meniń eń kúshti motıvatsııam boldy. Kún saıyn qazaq tilinde oqýǵa tyrysatynmyn, bastapqyda azdap qana este saqtaı alatynmyn. Biraq men tabandy boldym, árbir áripti qaıta-qaıta qaıtalap aıta berdim. Keıin Dımashtyń barlyq ánin oryndadym. Men sizderdiń tilińizdi shynymen erekshe dep sanaımyn, sondyqtan ony shynaıy qyzyǵýshylyqpen jáne izdenispen úırenemin, — dedi ol.
Aıta keteıik, birinshi konkýrs 2023 jyly Pekınde, ekinshi 2024 jyly Sıanda ótken bolatyn. Bıyl shara qaıtadan QHR astanasyna oraldy.