Qytaı Astana AI Film Festival festıvaliniń resmı seriktesine aınaldy
ASTANA. KAZINFORM — Qytaıdaǵy Qazaqstan Respýblıkasynyń Elshiliginiń qoldaýymen Beıjiń qalasyndaǵy Shougang parkinde Astana AI Film Festival (AAIFF 2026) festıvaliniń resmı tanystyrylymy jáne AI-kıno men televıdenıe salasyndaǵy Qazaqstan Qytaı ınnovatsııalyq almasý forýmy ótti.
Іs-shara eki eldiń jetekshi tehnologııalyq kompanııalarynyń, kınostýdııalarynyń, joǵary oqý oryndarynyń, ǵylymı-zertteý ortalyqtarynyń, ınvestorlarynyń, AI-ázirleýshileriniń jáne kınoındýstrııa ókilderin basyn qosty. Forým aıasyndaǵy mańyzdy oqıǵalardyń biri — Astana AI Film Festival qory men Beijing Zhongguancun Tongli Technology Service Co., Ltd. kompanııasy arasynda yntymaqtastyq týraly memorandýmǵa qol qoıylýy boldy. Qujat AI-kıno, AIGC tehnologııalary, ǵylymı-fantastıkalyq kontent, ınvestıtsııalar jáne halyqaralyq dıstrıbýtsııa baǵyttaryndaǵy birlesken jobalardy damytýdy kózdeıdi. Kelisimge sáıkes qytaılyq kompanııa Qytaı Halyq Respýblıkasyndaǵy Astana AI Film Festival festıvaliniń resmı seriktesi bolady.
— Qytaı — jahandyq AI-kıno ekojúıesin damytýdaǵy negizgi seriktesterdiń biri. Munda álemdegi eń qýatty tehnologııalyq kompanııalar, talantty avtorlar jáne tsıfrlyq kontenttiń eń iri naryǵy shoǵyrlanǵan. Bul memorandýmǵa qol qoıý Qazaqstan men Qytaı arasyndaǵy kreatıvti ındýstrııalar salasyndaǵy júıeli yntymaqtastyqtyń bastamasy bolady, — dedi Astana AI Film Festival festıvaliniń negizin qalaýshylardyń biri ári dırektorlar keńesiniń tóraǵasy Almas Jalı.
Tanystyrylym barysynda uıymdastyrýshylar 1–3 qazan aralyǵynda Astana AI Week aıasynda Astanada ótetin Astana AI Film Festival festıvaliniń halyqaralyq tujyrymdamasyn usyndy.
— Jasandy ıntellekt kıno tilin ózgertip, shyǵarmashylyqty shyn máninde jahandyq deńgeıge shyǵaryp otyr. Búginde daryndy avtor álemniń kez kelgen núktesinen halyqaralyq deńgeıdegi fılm jasaı alady. Sondyqtan Astana AI Film Festival — jobanyń shyqqan eline emes, ıdeıanyń qýatyna, oqıǵanyń sapasyna jáne onyń júzege asyrylý deńgeıine basymdyq beretin ashyq halyqaralyq alań retinde qurylyp otyr. Qytaımen yntymaqtastyq eki eldiń avtorlary úshin jańa múmkindikterge jol ashady dep senemiz, — dedi Astana AI Film Festival festıvaliniń negizin qalaýshylardyń biri ári kreatıvti dırektory Aızatýlla Hýsseın.
Іs-shara Qazaqstan-Qytaı AI-kıno jáne televıdenıe salasyndaǵy ınnovatsııalyq almasý forýmymen jalǵasty. Saraptamalyq sessııalar men paneldik pikirtalastar barysynda jetekshi kınostýdııalardyń, tehnologııalyq kompanııalardyń jáne ǵylymı-zertteý ortalyqtarynyń ókilderi kınematografııada jasandy ıntellektti qoldaný, AI-kontentti damytý, shyǵarmashylyq úderisterdiń transformatsııasy, halyqaralyq yntymaqtastyq tetikteri jáne birlesken jobalardy álemdik naryqqa shyǵarý múmkindikterin talqylady. Pikirtalastarǵa PixVerse AI, China Film Group janyndaǵy Jasandy ıntellekt ǵylymı-zertteý ınstıtýty, Bauhinia Films (Shenzhen) Co., Ltd., Chjýngýantsýn ǵylymı-fantastıkalyq ındýstrııa ınnovatsııalyq ortalyǵy jáne Qytaıdyń AIGC salasyndaǵy basqa da jetekshi kompanııalarynyń basshylary men ókilderi qatysty.
Forým qorytyndysy boıynsha taraptar jasandy ıntellekt, kınoındýstrııa jáne tsıfrlyq kreatıvti tehnologııalar salalarynda Qazaqstan men Qytaı arasyndaǵy uzaq merzimdi seriktestikti damytýǵa nıetti ekenderin rastady. Eske salaıyq, Astana AI Film Festival 2026 jyldyń kúzinde Astanada ótip, AI-kıno salasyndaǵy eń iri halyqaralyq is-sharalardyń birine aınalady. Festıval aıasynda jalpy júlde qory 1 mıllıon AQSh dollaryn quraıtyn halyqaralyq baıqaý, konferentsııa, jobalar pıtchıngi, sondaı-aq jasandy ıntellekt, kıno jáne tsıfrlyq shyǵarmashylyq salalaryndaǵy álemdik jetekshi sarapshylardyń kezdesýleri ótedi.
