Qytaı áskeri Taıvan mańynda birlesken oqý-jattyǵý ótkizip jatyr

ASTANA. KAZINFORM – Qytaı Halyq-azattyq armııasynyń Shyǵys óńirlik qolbasshylyǵy Taıvan aralynyń mańynda qurlyq, teńiz, áýe jáne zymyran kúshteriniń qatysýymen birlesken oqý-jattyǵý ótkizýde. Bul týraly Lianhe Zaobao basylymy habarlady.

Shyǵys óńirlik qolbasshylyǵynyń resmı ókili Shı I 1 sáýirden bastap áskerı okrýgtiń qurlyq, teńiz, áýe jáne zymyran kúshteri Taıvan aralyna taqaý aımaqta kópjaqty teńiz jáne áýe patrýlderin uıymdastyryp, jedel urystyq daıyndyq, keshendi ústemdikke qol jetkizý, teńiz ben qurlyqtaǵy nysandarǵa soqqy jasaý, mańyzdy sý aıdyndary men arnalaryn baqylaýǵa alý sııaqty taktıkalyq jattyǵýlar ótkizetinin habarlady. Bul jattyǵýlar qarýly kúshterdiń birlesken jaýyngerlik daıyndyǵyn tekserýge baǵyttalǵan.

QHR Memlekettik keńesiniń Taıvan isteri jónindegi keńsesiniń resmı ókili Chjý Fenlıan búgin kezekti oqý-jattyǵý Taıvan jetekshisi Laı Tsınde men onyń «táýelsizdikke» umtylǵan «dalbasa áreketine» berilgen qatań jaýap ári Taıvan buǵazynyń beıbitshiligine ádeıi qaýip tóndirip otyrǵan separatıstik kúshterge jasalǵan qatal eskertý ekenin málimdedi.

Chjý Fenlıannyń aıtýynsha, Laı Tsınde «Taıvan táýelsizdigi» ustanymynan bas tartpaı, materıktik Qytaıdy ashyqtan-ashyq «sheteldik jaý kúshi» dep atap, qaıdaǵy bir «17 tarmaqty strategııany» kóldeneń tartyp, materıktik Qytaıǵa qarsy nasıhatty údetip, ekijaqty baılanysqa tosqaýyl qoıyp, Taıvan buǵazyndaǵy shıelenisti kúsheıtip otyr.

Chjý Fenlıan «Taıvan táýelsizdiginiń» soǵys shaqyratynyn, Taıvan halqyna qaýip pen qater ákeletinin basa aıtty.

Onyń aıtýynsha, Qytaıdyń Taıvan máselesin sheshý men Otandy qaıta biriktirý jolyndaǵy ustanymy bolattaı berik, eshbir kúshtiń Taıvandy Qytaıdan bólip áketýine jol berilmeıdi, «táýelsizdikti» jaqtaıtyn kez kelgen separatıstik áreketke múmkindik joq.

Al Taıvannyń «Qorǵanys mınıstrligi» seısenbi kúni jarııalaǵan málimdemege sáıkes, 31 naýryz tańǵy saǵat 6:00-den 1 sáýir tańǵy saǵat 6:00-ge deıin Halyq-azattyq armııasynyń 19 áskerı kemesi Taıvan aralynyń mańyna taıap barǵan. Sondaı-aq, Qytaıdyń «Shandýn» avıanosetster toby da alǵash ret Taıvannyń jedel áreket aımaǵyna iz tastady. «Taıvan áskeri» áýe jáne teńiz kúshteri men jaǵalaýdaǵy zymyran júıesi arqyly jaǵdaıdy muqııat baqylap otyr.

Málimdemede Taıvan «qarýly kúshteriniń» jaǵdaıdy baqylaý úshin barlaý júıesi men jedel áreket mehanızmin de iske qosqany habarlandy.

Málimdemede Taıvanǵa tóngen qaýiptiń kún sanap artyp kele jatqany atap ótildi.

-Taıvan áskeri araldy qorǵaýǵa tas-túıin daıyn otyr, biz «qaqtyǵysty ýshyqtyrmaý, janjal týdyrmaý» qaǵıdatyn ustanyp, sur aımaqtaǵy yqtımal shabýylǵa salqyn sabyrmen laıyqty jaýap beremiz,-delingen málimdemede.

Sondaı-aq onda Taıvan taraby araldyń qaýipsizdigi men qorǵanysyn qamtamasyz etýge tolyq daıyn ekeni aıtylǵan.

Aıta ketsek, buǵan deıin Qytaı Syrtqy ister mınıstrliginiń resmı ókili Go Tszıakýn bir ǵana Qytaı baryn, Taıvan Qytaıdyń bir bóligi ekenin jáne Qytaı Halyq Respýblıkasynyń úkimeti — búkil Qytaıdy bildiretin jalǵyz zańdy úkimet ekenin taǵy bir atap ótken bolatyn.

Osyǵan deıin Qytaıdyń JI-men jabdyqtalǵan uzaq qashyqtyqqa ushatyn apparat shyǵarǵany týraly jazdyq.