Qytaı áskeri alǵash ret avtomat arqalaǵan robot ıtin kórsetti
BEIJІŃ. KAZINFORM — «Altyn aıdahar-2024» taqyrybymen ótken bul áskerı oqý-jattyǵýda Qytaı armııasy robot ıtin kórsetip, el nazaryn ózine aýdardy.
Qytaı men Kambodja áskerıleri 15 kúndik birlesken áskerı jattyǵý ótkizip jatyr.
Qytaıdyń resmı basylymy Global Times habarlaýynsha, «Altyn aıdahar-2024» kod ataýymen atalǵan shara — eki el arasynda buryn-sońdy ótkizilgen eń iri áskerı jattyǵý.
Oǵan qatysý úshin Qytaı áskeri 760, Kambodja 1315 adam jiberdi.
Sonymen qatar, bul áskerı jattyǵýǵa Qytaıdyń 3 áskerı kemesi, 11 Kambodja áskerı kemesi, 2 tikushaǵy jáne 69 jaýyngerlik tehnıkasy qatysty.
Qytaı áskerıleri oqý-jattyǵý barysynda qarýly robot ıtterdi kórsetti. Bul - arqasyna avtomatty vıntovka ornatylǵan qashyqtan basqarylatyn tórtaıaqty robot.
Bul — Qytaı armııasynyń áskerı robot ıtterin alǵash ret kópshilikke kórsetýi.
Qytaı armııasy paıdalanatyn robot-ıtter negizinen eki túrge bólinetinin kópshilikke taraǵan vıdeokontentten kórýge bolady: biri barlaý úshin paıdalanylatyn robot ıt, ekinshisi — arqasyna avtomatty vıntovka ornatylǵan jaýyngerlik robot ıt, ol negizinen úılerdegi nysanalardy izdestirý jáne shabýylǵa qoldanylady.
Qytaılyq áskerıler mundaı robot ıt jasyryn jerden jaý nysandaryna shabýyl jasaı alady, bul áskerılerdiń soqqy berý qabiletin jaqsartady jáne óz shyǵynyn azaıtady dep málimdedi.
Kambodja men Qytaı áskerleriniń birlesken oqý-jattyǵýy 16 mamyrda bastalǵan.
Antıterrorlyq jáne gýmanıtarlyq kómek kórsetý maqsatynda ótkiziletin shara 30 mamyrda aıaqtalady.
Bul áskerı jattyǵýdyń barlyq shyǵynyn Qytaı óz moınyna alady.
