Qytaı ASEAN, Afrıka jáne Latyn Amerıkasynan taýar ımportyn arttyrdy
ASTANA. KAZINFORM — Qytaıdyń ASEAN, Latyn Amerıkasy jáne Afrıka elderinen ımport kólemi 2026 jyldyń alǵashqy on aıynda tarıhı eń joǵary kórsetkishke jetti. Bul týraly Qytaıdyń Bas keden basqarmasynyń ókili málimdedi, dep habarlaıdy Kazinform agenttiginiń Beıjińdegi menshikti tilshisi.
Qańtar-qazan aılarynda Qytaıdyń taýar aınalymy ótken jyldyń sáıkes kezeńimen salystyrǵanda 20%-ǵa ósip, 44,81 trln ıýanǵa (6,67 trln dollar) jetken.
Eksport kólemi 17,6%-ǵa artyp, 25,99 trln ıýan (3,87 trln dollar) boldy. Eksport qurylymyndaǵy mashına jasaý jáne elektronıka ónimderiniń úlesi 64,7%-ǵa jetip, olardyń jetkizilimi 25,2%-ǵa ósken.
Integraldyq mıkroshemalardyń eksporty 101,9%-ǵa, al jad mıkroshemalarynyń jetkizilimi 132,5%-ǵa artty. Elektromobılder, lıtıı batareıalary jáne fotoelektrlik ónimderdi qamtıtyn «jańa úshtik» taýarlar eksporty 46,5%-ǵa ósken.
Qytaı ımporty 23,6%-ǵa artyp, 18,82 trln ıýan (2,8 trln dollar) boldy. Al syrtqy saýdadaǵy oń saldo 7,17 trln ıýanǵa (1,06 trln dollar) jetti.
— Bıyl alǵashqy on aıda 150-den astam el men aımaqtan ımport kólemi ósti. Ásirese, ASEAN, Latyn Amerıkasy jáne Afrıka elderinen jetkizilgen taýarlar kólemi tarıhı eń joǵary deńgeıge jetti, — dedi Qytaı Bas keden basqarmasynyń statıstıka jáne taldaý departamentiniń basshysy Lıýı Dalıan.
Buǵan deıin Qytaı ózimen dıplomatııalyq qatynasy bar barlyq Afrıka elderine nóldik kedendik baj rejımin usynatynyn jazǵan bolatynbyz.