Qytaı asa mańyzdy mıneraldardyń keıbir túrine eksporttyq baqylaýdy alyp tastady

ASTANA. KAZINFORM — Qytaıdyń Saýda mınıstrligi 9 qarasha kúni gallıı, germanıı, súrme jáne grafıt sekildi asa mańyzdy mıneraldarǵa qatysty eksporttyq shekteý ýaqytsha toqtatylatynyn jarııalady.

Mınıstrliktiń resmı saıtynda jarııalanǵan habarlamaǵa sáıkes, «AQSh-qa qosarlanǵan maqsattaǵy taýarlardy eksporttaýǵa baqylaýdy kúsheıtý týraly» Qytaı Saýda mınıstrliginiń 2024 jylǵy №46 habarlamasynyń ekinshi tarmaǵynyń oryndalýy búginnen bastap 2026 jyldyń 27 qarashasyna deıin toqtatylady.

Ótken jyldyń jeltoqsan aıynda jarııalaǵan №46 habarlamanyń ekinshi tarmaǵynda gallıı, germanıı, súrme jáne asa qatty materıaldarǵa qatysty qosarlanǵan maqsattaǵy taýarlardy AQSh-qa eksporttaýǵa qaǵıda túrinde ruqsat berilmeıdi; al grafıtke qatysty eksport kezinde sońǵy paıdalanýshy men sońǵy maqsatqa baılanysty qatań baqylaý engiziledi, dep kórsetilgen bolatyn.

AQSh prezıdenti Donald Tramp pen QHR tóraǵasy Sı Tszınpın 30 qazan kúni Pýsan qalasynda ótken kezdesýde saýda kelisimi týraly ýaǵdalastyqqa qol jetkizgen bolatyn. Kelisimge saı Qytaı sırek jer metaldaryna arnalǵan eksporttyq lıtsenzııa sharalarynyń oryndalýyn bir jylǵa keıinge qaldyrýǵa tıis. Bul Qytaı engizgen shekteýlerdiń jahandyq jetkizý tizbegine jasaıtyn yqtımal áseri týraly alańdaýshylyqty aıtarlyqtaı báseńdetken edi.

Aq úıdiń 1 qarashadaǵy málimdemesine sáıkes, Qytaı sırek jer metaldarynyń eksportyna engizilgen baqylaý sharalarynyń oryndalýyn toqtatýmen qatar, gallıı, germanıı, súrme jáne grafıt sekildi strategııalyq mańyzy bar mıneraldarǵa eksporttyq lıtsenzııa berýge mindetti.

Eske sala ketsek, 6 qarasha kúni Qazaqstan Respýblıkasy men Amerıka Qurama Shtattary asa mańyzdy mıneraldar salasy boıynsha yntymaqtastyq jónindegi ózara túsinistik týraly memorandýmǵa qol qoıǵan bolatyn.