Qytaı Antarktıdaǵa baǵyttalǵan 42-shi ekspedıtsııasyn bastady
ASTANA. KAZINFORM — Qytaıdyń 42-shi antarktıkalyq ekspedıtsııasy senbi kúni Shanhaıdan saparǵa attandy, dep habarlaıdy Sınhýa agenttigi.
«Bul ekspedıtsııa barysynda Qytaı alǵash ret Antarktıda muz jamylǵysynyń tereń bóliginde ornalasqan kólderde eksperımenttik burǵylaý júrgizýdi josparlap otyr. Otandyq ystyq sýmen jáne termoplav tehnıkasymen jumys isteıtin burǵylaý júıelerin paıdalana otyryp, biz qalyńdyǵy 3000 metrden asatyn muzda burǵylaý jáne synama irikteý jumysyn júrgizemiz», dedi 42-shi qytaılyq antarktıkalyq ekspedıtsııanyń jetekshisi jáne bas ǵylymı qyzmetkeri Veı Fýhaı.
Antarktıdanyń muz astyndaǵy kólderi joǵary qysym, tómen temperatýra, jaryqtyń bolmaýy jáne olıgotrofty orta sııaqty ekstremaldy jaǵdaılarmen erekshelenedi. Bul jerde biregeı ekojúıe qalyptasady jáne muz jamylǵysynyń qatpar-qatpar tarıhy men klımattyq ózgeristerdiń aýqymdy shejiresi saqtalǵan. Sondyqtan ǵalymdarǵa bul kólderdi zertteý shógindi úderisterin jáne tirshiliktiń evolıýtsııasyn túsiný úshin qajet bolyp otyr.
Antarktıdanyń jahandyq klımat ózgerisindegi rólin tereńirek zertteý úshin ekspedıtsııa qatysýshylary Amýdsen teńizi men Ross teńizi sııaqty negizgi aımaqtarda uzaq merzimdi baqylaýlar boıynsha derekter jınamaq.
Qytaıdyń polıarlyq ekspedıtsııalar jónindegi memlekettik okeanologııa basqarmasy dırektorynyń orynbasary Lýn Veıdiń aıtýynsha, Antarktıdany zertteý, qorǵaý jáne ıgerý týraly bilim men múmkindikterdi únemi jetildirý – Qytaıdyń teńiz derjavasyna aınalý umtylysy úshin ǵana emes, adamzattyń ortaq taǵdyr qaýymdastyǵyn qurý ıdeıasyn ilgeriletýge jańa úles qosý bastamasy bolyp otyr.
Eske sala ketsek, keshe Qytaıda jańa jahandyq teńiz ekspedıtsııasy bastalǵanyn jazdyq.