Qytaı altyn satyp alýdy sońǵy úsh jyldaǵy eń joǵary deńgeıge jetkizdi
ASTANA. KAZINFORM – Qytaı Halyq banki tamyz aıynda resmı altyn qoryn 650 myń ýntsııaǵa arttyryp, 76,73 mln ýntsııaǵa jetkizdi. Bul – sońǵy úsh jylǵa jýyq ýaqyttaǵy eń joǵary aılyq ósim, dep habarlaıdy China Daily.
Qytaıdyń ortalyq banki osymen 22 aı qatarynan altyn qoryn ulǵaıtyp otyr.
Tamyzdaǵy satyp alý kólemi 2023 jylǵy qazandaǵy kórsetkishke jaqyndady. Ol kezde Qytaı Halyq banki altyn qoryn bir aıda 740 myń ýntsııaǵa arttyrǵan edi.
Sonymen qatar Qytaıdyń valıýtalyq rezervteri de ósti. Tamyz aıynyń sońynda eldiń valıýta qory aldyńǵy aımen salystyrǵanda 19,5 mlrd dollarǵa ulǵaıyp, 3,4383 trln dollarǵa jetti. Osylaısha, kórsetkish ekinshi aı qatarynan ósip otyr.
– Valıýta rezervteriniń ósýi tamyz aıynda AQSh dollary ındeksiniń tómendeýi aıasynda boldy. Bul rette álemdik negizgi qarjy aktıvteriniń baǵasy ártúrli baǵytta ózgerdi, – dep málimdedi Qytaıdyń Valıýtalyq baqylaý jónindegi memlekettik basqarmasy.
Qytaıdyń altyn qoryn qatarynan 22 aı boıy ulǵaıtýy eldiń rezervterindegi baǵaly metaldyń úlesin arttyrý saıasaty jalǵasyp otyrǵanyn kórsetedi.
Aıta keteıik, Nıderland AQSh pen Kanadadaǵy altyn qorynyń bir bóligin shyǵardy.
