Qytaı alǵashqy ıýanǵa baılanǵan steıblkoındy iske qosýdy qarastyrady

ASTANA. KAZINFORM — Beıjiń alǵash ret ulttyq valıýtany ınternatsıonaldandyrýdy yntalandyrý maqsatynda ıýanǵa baılanǵan steıblkoındardy paıdalanýǵa ruqsat berýi múmkin, dep habarlaıdy Reuters.

Habarlamaǵa sáıkes, osy aıdyń sońyna deıin Qytaıdyń Memlekettik keńesi ıýandy halyqaralyq esep aıyrysýlarda keńinen qoldaný jónindegi jol kartasyn qarastyryp, ony bekitýi múmkin.

Qujatta shetelde qytaı valıýtasyn qoldaný boıynsha naqty maqsattar, qarjy retteýshilerdiń mindetteri jáne táýekelderdi basqarý sharalary belgilenbek.

Bul jospardyń qabyldanýy Beıjińniń qarjy saıasatyna mańyzdy betburys ákelmek. 2021 jyly Qytaı krıptovalıýtamen saýda men maınıngke tolyq tyıym salǵan edi. Alaıda búginde el steıblkoındardy qarjylyq ınnovatsııa retinde qarap, olardy ıýanniń halyqaralyq bedelin arttyrý quraly retinde qarastyryp jatyr. Bul — dollarlyq krıptovalıýtalardyń yqpaly ósip jatqan kezeńge saı qadam.

Jańa bastamany júzege asyrýdyń negizgi alańdary retinde Gonkong pen Shanhaı tańdalmaq. 1 tamyzdan bastap Gonkongta fıat valıýtalarmen qamtamasyz etilgen steıblkoındardy shyǵarýshylardy retteıtin zań kúshine endi. Al Shanhaıda tsıfrlyq ıýanmen operatsııalar júrgizetin halyqaralyq ortalyq qurylady.

ıÝanniń rólin keńeıtý jáne steıblkoındardy engizý máselesi halyqaralyq deńgeıde de talqylanbaq. Bul taqyryp 31 tamyz – 1 qyrkúıek aralyǵynda Tıantszınde ótetin ShYU sammıtiniń kún tártibine enýi múmkin.

CoinGecko derekterine súıensek, qazirgi ýaqytta álemdik steıblkoın naryǵynyń kólemi shamamen 247 mlrd dollardy quraıdy. Al Standard Chartered Bank boljamy boıynsha, bul kórsetkish 2028 jylǵa qaraı 2 trln dollarǵa jetýi múmkin.

Osyǵan deıin Japonııanyń Qarjylyq qyzmetter agenttigi osy kúzde eldegi alǵashqy ulttyq valıýtaǵa tolyq baılanǵan steıblkoındi shyǵarýǵa ruqsat beretinin jazǵan edik.