Qytaı alǵashqy ǵaryshtyq týrızm jobasyn tanystyrady

ASTANA. KAZINFORM – Qytaı 14-16 qarasha aralyǵynda Shenchjendegi Halyqaralyq kórme ortalyǵynda ótetin 27-shi Qytaı halyqaralyq joǵary tehnologııalar jármeńkesinde eldiń alǵashqy ǵaryshtyq týrızm jobasyn tanystyrady, dep habarlaıdy China Daily.

Jergilikti bıliktiń málimetinshe, Qytaıdyń ǵaryshtyq týrızm baǵdarlamasynyń bastamashysy – Qytaıdyń aeroǵaryshtyq ǵylym jáne tehnologııa korporatsııasy.

Bıyl 400 myń sharshy metrlik alańda jasandy ıntellekt, jartylaı ótkizgishter, tómen bıiktiktegi ekonomıka jáne kommertsııalyq ǵaryshkerlik salasyndaǵy ulttyq jobalar men ozyq ázirlemeler tanystyrylady.

Іs-sharaǵa Qytaıdyń eń iri 40 memlekettik kásiporny, sonyń ishinde China Southern Power Grid, China Rare Earth Group jáne China Electric Equipment Group kompanııalary qatysady. Empyrean Technology, OpenHarmony jáne Guangming Laboratory sııaqty jetekshi kompanııalar men zertteý ortalyqtary da ózderiniń tehnologııalyq sheshimderin usynady.

Jármeńke aıasynda forýmdar, roýd-shoýlar jáne satyp alý sessııalaryn qosa alǵanda jalpy 200-den astam is-shara ótedi. Uıymdastyrýshylar kórmeniń Qytaı úshin ozyq tehnologııalar men ınnovatsııalardy tanystyrýdyń negizgi alańy retindegi rólin atap ótip, oǵan shamamen 450 myń kelýshini kútip otyr.

Osyǵan deıin Qytaı men AQSh port alymdaryn bir jylǵa toqtatqany týraly jazdyq.