Qytaı alǵash ret jasandy jatyry bar robotty tanystyrdy

ASTANA. KAZINFORM – Qytaılyq Kaiwa Technology kompanııasy uryqty 10 aı boıy kóterip, náresteni dúnıege ákelýge arnalǵan álemdegi alǵashqy adam tárizdi robot prototıpin tanystyrdy, dep habarlaıdy Interesting Engineering. 

Joba amnıotıkalyq suıyqtyqpen toltyrylǵan jasandy jatyr modýline negizdelgen. Onda embrıon damyp, tabıǵı júktilikke elikteıtin arnaıy tútik arqyly qorektik zattardy alady.

Startaptyń bas dırektory jáne negizin qalaýshy doktor Chjannyń aıtýynsha, qurylǵy janýarlarda synaqtan sátti ótti. Robottyń ózi 2026 jyly naryqta shamamen 100 000 ıýan (shamamen 14 000 dollar) baǵasymen paıda bolady. Tehnologııa balaly bolǵysy keletin, biraq bıologııalyq júktilikten aýlaq bolýǵa tyrysatyn jastarǵa, bala kótere almaıtyn otbasylarǵa, sondaı-aq jalǵyzbasty adamdarǵa arnalǵan.

Bul joba qytaılyq áleýmettik jelilerde qyzý reaktsııa týdyrdy. «Álemdegi birinshi júkti robot» suraýy boıynsha Weibo izdeý reıtınginde kóshbasshy boldy. Pikirler ekige bólinedi: dattaýshylar tehnologııany synap, mańyzdylyǵy tómen dep atasa, jaqtaýshylar ony áıelderdi júktilik kezindegi fızıkalyq qıyndyqtardan aryltý ádisi dep sanaıdy. 

– 2020 jylda Qytaıda bedeýlik 18 paıyzǵa jetkenin jáne elde sýrrogat anaǵa tyıym salynǵanyn eskersek, mundaı tehnologııaǵa suranys óte joǵary bolýy múmkin, - dep jazdy Interesting Engineering.

Kóptegen jeli qoldanýshysy robot olarǵa balaly bolý armandaryn júzege asyrýǵa kómektesedi dep úmittenedi. 

Eske sala keteıik, buǵan deıin Qytaıda chıkýngýnıaǵa arnalǵan ekspress-test ázirlengenin habarlaǵan bolatynbyz.