Qytaı alǵash ret ǵaryshqa adamnyń jasandy embrıonyn jiberdi
ASTANA. KAZINFORM – Qytaı alǵash ret adamnyń jasandy embrıonyna qatysty ǵaryshtyq eksperımentti bastady, dep habarlaıdy Sınhýa agenttigi.
Zertteý Qytaıdyń orbıtalyq stantsııasy bortynda júrgizilip jatyr. Eksperıment ǵalymdarǵa mıkrogravıtatsııanyń adam jasýshalarynyń erte damý kezeńderine jáne bolashaqtaǵy uzaq merzimdi ǵarysh mıssııalaryna yqpalyn túsinýge kómektesýi tıis.
Qytaı ǵylym akademııasynyń Ǵarysh tehnologııalary ortalyǵynyń málimetinshe, tájirıbelik úlgiler orbıtaǵa «Tıanchjoý-10» júk kemesi arqyly jetkizilgen. Stantsııaǵa jetkennen keıin ǵaryshkerler materıaldardy ǵylymı modýlge ornalastyrǵan.
Ǵalymdar bul naǵyz adam embrıondary emes ekenin atap ótti. Olar – diń jasýshalarynan jasalǵan arnaıy bıologııalyq qurylymdar. Mundaı modelder embrıon damýynyń bastapqy kezeńderin ımıtatsııalaıdy, alaıda tolyqqandy aǵzaǵa aınala almaıdy.
Joba jetekshisi ıÝı Letsıan eksperıment qalypty rejımde ótip jatqanyn málimdedi. Onyń aıtýynsha, stantsııadaǵy avtomattandyrylǵan júıe zertteýge qajetti jaǵdaılardy saqtaý úshin qorektik ortany kún saıyn aýystyryp otyrady.
Ǵalymdar eki tájirıbelik modeldi zerttep jatyr: bireýi jatyr jasýshalaryna ornalastyrylǵan, ekinshisi mıkroflıýıdtik chıptiń ishinde ornalasqan. Negizgi maqsat – salmaqsyzdyqtyń jasýshalardyń erte damý protsesterine qalaı áser etetinin anyqtaý.
Sonymen qatar dál osyndaı zertteýler Jerde de qatar júrgizilip jatyr. Bul ǵalymdarǵa gravıtatsııa jáne mıkrogravıtatsııa jaǵdaıyndaǵy jasýsha damýynyń aıyrmashylyqtaryn salystyrýǵa múmkindik beredi.
Eksperıment bes kúnge eseptelgen. Tsıkl aıaqtalǵannan keıin úlgiler orbıtada muzdatylady, sodan soń ári qaraı taldaý júrgizý úshin Jerge qaıtarylady.
Qytaılyq zertteýshilerdiń pikirinshe, alynǵan derekter adamnyń ǵaryshta uzaq ýaqyt bolýyna baılanysty qaýipterdi zertteýde jáne bolashaqtaǵy alys ǵarysh mıssııalaryn ıgerýde mańyzdy ról atqarýy múmkin.
Eske sala ketsek, buǵan deıin Qytaı ǵaryshta aýrýhana salý úshin orbıtaǵa medıtsınalyq jabdyqtar jibergenin jazdyq.
