Qytaı álemdegi eń iri keshendi kólik júıesin qalyptastyrdy
ASTANA. KAZINFORM — Sońǵy bes jylda Qytaı álemdegi eń iri ári eń keń qamtylǵan keshendi kólik ınfraqurylymy júıesin jasaqtady, dep habarlaıdy Kazinform agenttiginiń Beıjińdegi menshikti tilshisi.
Bul jóninde seısenbi kúni QHR Kólik mınıstriniń orynbasary Sıýı Chengýan 15-besjyldyq aıasynda eldi kólik derjavasyna aınaldyrý mindetterine arnalǵan baspasóz máslıhatynda málimdedi.
Onyń aıtýynsha, 14-besjyldyq kezeńi ınvestıtsııa kólemi men qurylys qarqyny jaǵynan Qytaı tarıhyndaǵy rekordtyq kezeń boldy. Kólik salasynyń negizgi qorlaryna salynǵan ınvestıtsııa kólemi 18,8 trln ıýandy (shamamen 2,8 trln AQSh dollary) qurady. Ulttyq kólik jelisiniń jalpy uzyndyǵy 6 mıllıon shaqyrymnan asty, al onyń negizgi qańqasynyń daıyndyq deńgeıi 91%-ǵa jetti.
— Kólik ınfraqurylymynyń aýqymy boıynsha Qytaı álemdik kóshbasshylardyń qatarynda berik ornyqty. Joǵary jyldamdyqty temirjoldardyń uzyndyǵy 50 myń shaqyrymnan, avtomobıl joldarynyń uzyndyǵy 199 myń shaqyrymnan asty. Elde 3061 iri aılaq pen 270 iri áýejaı jumys isteıdi. Sonymen qatar álemdegi eń iri kýrerlik jeli quryldy, — dedi ol.
Mınıstr orynbasary jolaýshylar tasymaly da qarqyndy ósip kele jatqanyn atap ótti. Sońǵy bes jylda joǵary jyldamdyqty temirjoldardaǵy jolaýshylar sany 132%-ǵa, al azamattyq avıatsııadaǵy jolaýshylar aǵyny 84%-ǵa artqan.
Sonymen qatar Qytaı teńiz tasymaly men jedel jetkizý qyzmetteri kólemi boıynsha álemdegi jetekshi ornyn saqtap otyr.
Buǵan deıin 2026 jyldyń birinshi jartyjyldyǵynyń qorytyndysy boıynsha Qazaqstan men Qytaı arasyndaǵy júk tasymalynyń kólemi 18,7 mln tonnaǵa jetip, ótken jyldyń sáıkes kezeńimen salystyrǵanda 9%-ǵa artqany habarlandy.
