Qytaı álemdegi eń qýatty qysqa tolqyndy qarý jasap shyǵardy

ASTANA.KAZINFORM – Sıandaǵy Soltústik-Batys ıadrolyq tehnologııalar ınstıtýtynyń ǵalymdary salmaǵy 5 tonna, qýaty 20GVt bolatyn «TPG1000Cs» qysqa tolqyndy teńdessiz qurylǵy shyǵardy. Ol tómen, orbıtaǵa jaqyn ornalasqan spýtnıkterdi isten shyǵarýǵa qaýqarly, dep habarlaıdy South China Morning Post.

Jańa qurylǵy 60 sekýnd boıy úzdiksiz oq jaýdyrýǵa qabiletti. Salystyrý úshin aıtsaq, álemde qoldanysta bolǵan balama júıeler, sonyń ishinde reseılik «Sınýs-7» kesheni, bir sekýndtan artyq úzilissiz jumys isteı almaǵan ári salmaǵy da eki ese aýyr bolǵan.

Ottyń joǵary tyǵyzdyǵy qysqatolqyndy qondyrǵyǵa bir ǵana seans barysynda 3000-ǵa deıin joǵary energııaly ımpýls óndirýge múmkindik beredi. Bul kórsetkish uqsas kez kelgen júıeniń múmkindigin birneshe ese artta qaldyrady. «TPG1000Cs» qondyrǵysy synaq rejıminde 200 myńnan astam ımpýls jasap, jumysynyń turaqtylyǵy men senimdiligin naqty dáleldedi.

Beıjiń resmı túrde amerıkalyq Starlink spýtnıkterin ulttyq qaýipsizdikke tónetin qater retinde baǵalaıdy. Osyǵan baılanysty qýatty mıkrotolqyndy júıeler men lazerlerdi ázirleý iri spýtnıktik nysandarǵa qarsy ekonomıkalyq turǵydan tıimdi tetik qalyptastyrýdyń basym baǵytyna aınaldy.

Osyǵan deıin Qytaıdyń gıbrıdti júk tasıtyn dron ushaǵy alǵash ret áýege kóterilgeni týraly jazǵan edik.