Qytaı aldaǵy aılarda munaı ımportyn ulǵaıtýy múmkin
ASTANA. KAZINFORM — Taıaý Shyǵystaǵy qaqtyǵys bastalǵaly beri Qytaıda shıki munaı ımporty tómen deńgeıde saqtalyp kelgen edi. Degenmen sońǵy derekter aldaǵy birneshe aıda Qytaıda munaı ımportynyń qaıta ulǵaıýy múmkin ekenin kórsetti, dep jazdy Lianhe Zaobao.
Munaı tankerleriniń qozǵalysy jóninde Bloomberg agenttigi jınaqtaǵan derekterge súıene otyryp, sıngapýrlyq basylym aldaǵy 90 kúnniń ishinde Qytaı porttaryna shamamen 65 asa iri munaı tankeri tumsyq tireýi tıis dep boljaıdy. Bul — mamyrdyń ortasynan bergi eń joǵary kórsetkish. Al árbir tanker shamamen 2 mıllıon barrelge deıin shıki munaı tasymaldaýǵa qaýqarly.
Búgingi kúnde naryq qatysýshylary Qytaıdyń munaı satyp alýǵa baılanysty qandaı saıasat qoldanatynyn jiti baqylap otyr. Basylymnyń málimetinshe, buǵan deıin Qytaıda shıki munaıǵa suranystyń kútpegen jerden azaıýy jahandyq usynysqa túsetin qysymdy ájeptáýir báseńdetip, Irandaǵy áskerı shıeleniske baılanysty Ormýz buǵazy arqyly ótetin munaı tasymalynyń tosqaýylǵa ushyraýynan týyndaǵan naryqtyq táýekeldiń áserin aıtarlyqtaı azaıtqan bolatyn.
Sońǵy birneshe aıda Qytaıda memlekettik munaı óńdeý zaýyttary óndiris kólemin qysqartyp, qoımadaǵy qorlardy belsendi paıdalandy, tipti aldyn ala tapsyrys berilgen ımporttyq munaıdyń bir bóligin qaıta satýǵa shyǵardy. Saldarynan Qytaı baǵytyna qatynaıtyn asa iri munaı tankerleriniń júk kólemi kóp jyldan bergi eń tómen deńgeıge deıin quldyrap ketti. Al eldiń mamyr aıyndaǵy shıki munaı ımporty 2018 jyldan bergi eń tómengi kórsetkish retinde tirkelip otyr.
Buǵan deıin Qytaıdyń tarıhta alǵash ret «Chanchjen-10B» zymyran tasymaldaǵyshynyń birinshi satysyn Jerge sátti qaıtarǵanyn jazǵan edik.
