Qytaı AQSh jáne Reseımen ıadrolyq qarýsyzdaný kelissózine qatysýdan bas tartty
ASTANA. KAZINFORM – Qytaıdy AQSh jáne Reseımen ıadrolyq qarýsyzdaný jónindegi kelissózge qosylýǵa shaqyrý qısynsyz jáne shyndyqqa janaspaıdy. Bul týraly sársenbi kúni QHR Syrtqy ister mınıstrliginiń resmı ókili Go Tszıakýn málimdedi, dep habarlaıdy Sınhýa.
Go Tszıakýn kezekti vedomstvolyq baspasóz máslıhatynda AQSh prezıdenti AQSh prezıdenti Donald Tramptyń AQSh pen Reseı ózderiniń ıadrolyq arsenaldaryn qysqartý máselesin talqylap jatqany jáne Amerıka basshysy Qytaıdyń osy protseske qatysýyna úmittenetini týraly sońǵy málimdemesi týraly suraqqa jaýap berip, osylaı málimdedi.
Qytaılyq dıplomattyń aıtýynsha, álemdegi eń úlken ıadrolyq arsenalǵa ıe el ıadrolyq qarýsyzdaný boıynsha óziniń erekshe jáne negizgi mindettemelerin adal oryndaýy, ıadrolyq arsenalyn túbegeıli jáne aıtarlyqtaı qysqartýdy jalǵastyrýy jáne ıadrolyq qarýsyzdanýdy tolyq jáne jan-jaqty túpkilikti júzege asyrý úshin jaǵdaı jasaýy tıis.
- Qytaıdyń ıadrolyq múmkindikteri AQSh-pen birdeı deńgeıde emes. Al eki eldiń ıadrolyq saıasaty men strategııalyq qaýipsizdik jaǵdaıy múldem basqa,- dedi Go Tszıakýn.
Qytaıdyń ıadrolyq qarýdy birinshi qoldanbaý saıasaty men ózin-ózi qorǵaýǵa baǵyttalǵan ıadrolyq strategııany ustanatynyn atap ótken dıplomat eldiń ıadrolyq kúshterin árqashan ulttyq qaýipsizdik úshin qajetti eń tómengi deńgeıde ustaıtynyn jáne eshqashan eshkimmen qarýlaný jarysyna barmaıtynyn aıtty.
Qytaıdyń ıadrolyq qýaty men ıadrolyq saıasaty – álem beıbitshiligine qosylǵan mańyzdy úles, dep qosty Go Tszıakýn.
Stokgolmdegi álem problemalaryn zertteý halyqaralyq ınstıtýtynyń (SIPRI) esebinde atap ótilgendeı, Reseı men AQSh birge barlyq ıadrolyq qarýdyń shamamen 90%-yna ıe (AQSh-ta 5177, Reseıde 5459 oqtumsyq bar). Instıtýt málimetinshe, qazir Qytaıda keminde 600 ıadrolyq oqtumsyq bar. Ol óziniń ıadrolyq arsenalyn kez kelgen basqa elge qaraǵanda tezirek ulǵaıtyp jatyr (2023 jyldan bastap jylyna shamamen 100 oqtumsyq).
Buǵan deıin Tramp Irannyń ıadrolyq nysandaryn joıatynyn eskertkenin jazǵan bolatynbyz.
Kazinform úshin arnaıy Sınhýa aqparat agenttigi usynǵan.