Qytaı AQSh-tyń jańa baj salyqtaryna baılanysty DSU-ǵa shaǵym túsirdi

ASTANA. KAZINFORM — Qytaı bıligi AQSh-tyń QHR taýarlaryna qosymsha baj salyǵyn engizýine baılanysty jaǵdaıdy retteýdi surap DSU-ǵa júgindi. Bul týraly QHR kommertsııa mınıstrliginiń habarlamasynda aıtylǵan, dep jazady Kazinform.

— Qytaı AQSh-tyń DSU erejelerin óreskel buzatyn jáne Qytaı men AQSh arasyndaǵy ekonomıkalyq jáne saýda yntymaqtastyǵynyń negizderine nuqsan keltiretin birjaqty baj salyqtaryn qaıta júrgizý týraly sheshimine úzildi-kesildi qarsy. Qytaı óziniń zańdy quqyqtary men múddesin berik qorǵaıdy jáne DSU erejelerine sáıkes kópjaqty saýda júıesi men Halyqaralyq ekonomıkalyq jáne saýda tártibin qoldaıdy, — delingen Qytaı vedomstvosynyń habarlamasynda.

Qytaıdyń ulttyq qaýipsizdigi men múddesin qamtamasyz etý maqsatynda 15 amerıkalyq kompanııany eksporttyq baqylaý tizimine engizý týraly sheshim qabyldandy.

Bul rette qytaılyq jetkizýshilerge AQSh-taǵy atalǵan kompanııalarǵa qos maqsattaǵy zattardy satýǵa tyıym salynady.

Shekteý qoıylatyn kompanııalar tiziminde leidos, Gibbs& Cox, Inc, IP Video Market Info, Inc., Sourcemap, Inc., Skydio, Inc., Rapid Flight LLC, Red Six Solutions, Shield AI, Inc., HavocAI, Neros Technologies, Group W, Aerkomm Inc., General Atomics Aeronautical Systems, Inc., General Dynamics Land Systems jáne Aero Vironment bar.

Qytaı bıligi sonymen qatar AQSh-tyń qosymsha 10 kompanııasyn senimsiz sýbektiler tizimine engizdi.

10 naýryzdan bastap Qytaı AQSh-tyń aýylsharýashylyq ónimderine 10-15% qosymsha tarıfter engizdi. Qosymsha bajdar taýyq eti, bıdaı, júgeri, maqta, soıa, shoshqa eti, sıyr eti, jemister men kókónister, sút jáne sút ónimderine qoldanylady.

AQSh 4 naýryzdan bastap Qytaıdan ákelinetin taýarlarǵa qosymsha 10% baj salyǵyn engizetinin málimdedi. Bul qadam AQSh-tyń aqpan aıynda Qytaıdan ákelinetin ónimge engizgen qosymsha 10% bajynan keıin jasaldy.

Buǵan deıin Donald Tramp Qytaı taýarlaryna baj salyǵyn 20 paıyzǵa deıin kótergeni málim boldy.