Qytaı AQSh-tyń qosymsha baj salyǵyn arttyrýyna qarsy shaǵym túsirdi

ASTANA. KAZINFORM – 2025 jylǵy 27 naýryz kúni tústen keıin Qytaı Halyq Respýblıkasynyń Saýda mınıstrligi kezekti baspasóz máslıhatyn ótkizip, Qytaıdyń AQSh-tyń qosymsha baj salyǵyn engizýine qatysty Dúnıejúzilik saýda uıymynyń (DSU) daýlardy sheshý mehanızmi sheńberinde shaǵym túsirgenin málimdedi, dep habarlaıdy Kazinform thepaper.cn saıtyna silteme jasap.

Qytaı Halyq Respýblıkasynyń Saýda mınıstrliginiń resmı ókili He ıAdýn málimdemesinde:

— AQSh-tyń Qytaıdan eksporttalatyn taýarlarǵa qosymsha baj salyǵyn engizýi — bul birjaqty jáne protektsıonıstik áreket bolyp tabylady jáne DSU erejelerin óreskel buzý sanalady. Osyǵan baılanysty Qytaı bul másele boıynsha DSU daýlardy sheshý mehanızmine júgindi. 14 naýryzda AQSh tarapy DSU-da kelissózder júrgizýge kelisti. Qytaı budan ári DSU normalaryna sáıkes tıisti rásimderdi jalǵastyrady, — dedi.

Buǵan deıin, 25 naýryzda ótken baspasóz máslıhatynda Qytaı Saýda mınıstrliginiń ókili AQSh-tyń birneshe qytaılyq kompanııalardy eksporttyq baqylaý tizimine engizýin synǵa alyp, ony «ulttyq qaýipsizdik tujyrymdamasyn keńinen paıdalaný jáne eksporttyq baqylaý sharalaryn asyra qoldaný» dep ataǵan bolatyn.

Qytaı tarapynyń aıtýynsha, bul qadam «basqa elderdiń kompanııalaryn basyp-janshý jáne olardyń damýǵa degen zańdy quqyqtaryn shekteý maqsatyn kózdeıdi», sondaı-aq «jahandyq óndiristik jáne jetkizý tizbekteriniń qaýipsizdigi men turaqtylyǵyna aıtarlyqtaı zııan keltiredi».

— AQSh-tyń bul áreketi ekijaqty dıalog pen yntymaqtastyq arqyly máselelerdi sheshý úshin qolaıly orta qalyptastyrýǵa yqpal etpeıdi. Qytaı tarapy AQSh-ty óz qateligin dereý túzetýge shaqyrady jáne Qytaı kompanııalarynyń zańdy quqyqtary men múddelerin qorǵaý úshin qajetti sharalardy qabyldaıtyn bolady, — dep málimdedi Qytaı Saýda mınıstrliginiń ókili.

Buǵan deıin Qytaıdyń Syrtqy ister mınıstrligi AQSh-tyń eksporttyq baqylaý quraldaryn asyra paıdalanyp, zańsyz birjaqty sanktsııalar engizýin aıyptaǵan bolatyn.