Qytaı AQSh-tyń Iranǵa jasaǵan shabýylyn qatań aıyptady
ASTANA. KAZINFORM — Qytaı AQSh-tyń Iranǵa jasaǵan shabýyldaryn jáne Halyqaralyq atom energııasy agenttiginiń kepildiginde turǵan ıadrolyq nysandarǵa baǵyttalǵan amerıkalyq bombalaýdy qatań aıyptaıdy. Bul týraly QHR Syrtqy ister mınıstrliginiń málimdemesinde aıtyldy.
— AQSh-tyń bul qadamy — Birikken Ulttar Uıymy Jarǵysynyń maqsattary men qaǵıdattaryn, sondaı-aq halyqaralyq quqyqty eleýli túrde buzý bolyp sanalady jáne Taıaý Shyǵystaǵy jaǵdaıdy odan ári ýshyqtyrady, — delingen Qytaı Syrtqy ister mınıstrliginiń málimdemesinde.
Qytaı qaqtyǵysqa qatysýshy barlyq tarapty, eń aldymen Izraıldi, tez arada oq atýdy toqtatýǵa, beıbit turǵyndardyń qaýipsizdigin qamtamasyz etýge, dıalog pen kelissózder bastaýǵa shaqyrdy.
— Qytaı tarapy halyqaralyq qaýymdastyqpen birlesip áreket etýge, ádilettilikti qorǵaýǵa, Taıaý Shyǵysta beıbitshilik pen turaqtylyqty qalpyna keltirýge járdemdesýge daıyn, — dep atap ótti Qytaı Halyq Respýblıkasy SІM.
Eske sala keteıik, 22 maýsymǵa qaraǵan túni AQSh Qarýly kúshteri Iran aýmaǵyndaǵy úsh iri ıadrolyq nysanǵa jappaı soqqy jasady. Bul — 1979 jyldan bergi alǵashqy osyndaı shabýyl.
AQSh prezıdenti Donald Tramp amerıkalyq áskerdiń Irannyń úsh ıadrolyq nysanyna sátti soqqy jasaǵannan keıin halyqqa úndeý joldady.
Irannyń Atom energetıkasy jónindegi agenttigi AQSh-tyń Natanz jáne Fordo qalalaryndaǵy zaýyttarǵa jasaǵan shabýylyna qaramastan, eldiń ýran baıytý baǵdarlamasy toqtatylmaıtynyn málimdedi. Irandaǵy ıadrolyq nysandarǵa soqqydan keıin radıatsııalyq qaýip anyqtalǵan joq
Keıinnen Iran AQSh-tyń ıadrolyq obektilerine jasaǵan soqqylaryna jaýap qatty. Sonymen qatar Iran AQSh-ty agressııa úshin aıyptap, halyqaralyq tergeýge alýdy talap etti.
Ulybrıtanııa Irannyń ıadrolyq nysandaryna AQSh-tyń soqqylaryn qoldady.
BUU Qaýipsizdik Keńesi AQSh-tyń Iranǵa soqqy jasaýyna baılanysty shuǵyl jınalys ótkizdi.