Qytaı AQSh-tyń 10 kompanııasyna eksporttyq shekteý engizdi
ASTANA. KAZINFORM — Qytaı AQSh-tyń 10 kompanııasyn eksporttyq baqylaý tizimine engizip, olarǵa qos maqsattaǵy taýarlardy jetkizýge tyıym saldy.
Qytaı Saýda mınıstrliginiń habarlaýynsha, sheshim ulttyq qaýipsizdik pen memlekettik múddelerdi qorǵaý, sondaı-aq taratpaý salasyndaǵy halyqaralyq mindettemelerdi oryndaý maqsatynda qabyldanǵan.
Tizimge AeroVironment, Red Cat Holdings, Teal Drones, IMSAR, BRINC Drones, Shield AI, Oshkosh Defense, L3Harris Maritime Services, MP Materials jáne USA Rare Earth kompanııalary endi.
Jańa erejege sáıkes, qytaılyq eksporttaýshylarǵa atalǵan kompanııalarǵa qos maqsattaǵy taýarlar, baǵdarlamalyq qamtamasyz etý men tehnologııalardy jetkizýge tyıym salynady. Qajet bolǵan jaǵdaıda eksport tek Qytaı Saýda mınıstrliginiń arnaıy ruqsatymen júzege asyrylady.
Qytaı Saýda mınıstrligi bul sheshim AQSh-tyń «Qytaıdyń áskerı kompanııalary» tizimin keńeıtýine jaýap retinde qabyldanǵanyn málimdedi.
Buǵan deıin AQSh Qorǵanys mınıstrligi atalǵan tizimge Alibaba, Baidu, BYD, Nio jáne basqa da qytaılyq kompanııalardy engizgen edi. Reuters agenttiginiń málimetinshe, bul tizim tikeleı sanktsııalardy kózdemegenimen, Pentagonǵa atalǵan kompanııalarmen kelisimshart jasaýǵa shekteý qoıady.
