Qytaı AQSh-ty Taıvan máselesine saqtyqpen qaraýǵa shaqyrdy
ASTANA. KAZINFORM – Qytaı Syrtqy ister mınıstrligi AQSh-ty «bir Qytaı» qaǵıdatyn qatań saqtaýǵa jáne Taıvan máselesine saqtyqpen qaraýǵa shaqyrdy, dep habarlaıdy Sınhýa.
Bul týraly Qytaı SІM-niń resmı ókili Mao Nın 12 qazanda ótken kezekti baspasóz máslıhatynda málimdedi.
Onyń aıtýynsha, Vashıngton «bir Qytaı» qaǵıdatyn jáne Qytaı men AQSh arasyndaǵy úsh birlesken kommıýnıkeniń erejelerin saqtap, eki el arasyndaǵy qarym-qatynastardyń turaqtylyǵyn, sondaı-aq aımaqtaǵy beıbitshilik pen qaýipsizdikti qamtamasyz etýge naqty úles qosýy tıis.
Qytaı dıplomaty bul málimdemeni AQSh Memlekettik departamentiniń ótken aptada Taıvannyń shyǵys jaǵalaýyndaǵy Qytaıdyń teńiz qyzmetin «aımaqtyq turaqtylyqqa nuqsan keltiredi» dep baǵalaýyna jaýap retinde jasady.
– Qytaı bul máselege qatysty óz ustanymyn birneshe ret naqty túsindirdi. Taıvan aralynyń shyǵysyndaǵy teńiz aıdynynda Qytaıdyń aıryqsha ekonomıkalyq aımaǵy men qurlyqtyq qaırańy bar. Sondyqtan atalǵan sýlardaǵy qyzmetimiz egemendik quqyqtarymyz ben zańnamamyz aıasynda júzege asyrylady. Bul zańdy áreket jáne ony synaýǵa negiz joq, – dedi Mao Nın.
Ol Qytaıdyń atalǵan aımaqta shıelenis týdyrýǵa nemese turaqtylyqty buzýǵa baǵyttalǵan áreketter jasamaǵanyn málimdedi.
– Qytaı tarapy eshqashan bul aımaqta arandatýshylyq jasap, turaqtylyqqa nuqsan keltirgen tarap bolǵan emes. Taıvan máselesi – Qytaıdyń ishki isi jáne oǵan qandaı da bir syrtqy aralasýǵa jol berilmeıdi, – dep atap ótti SІM ókili.
Aıta keteıik, buǵan deıin Qytaı AQSh Memlekettik departamentiniń saıtyndaǵy Taıvanǵa qatysty málimetti ózgertýin synǵa alyp, Vashıngtondy «bir Qytaı» qaǵıdaty men eki el arasyndaǵy úsh birlesken kommıýnıkeni saqtaýǵa shaqyrǵan bolatyn.
