Qytaı AQSh-ty ımporttyq ushqyshsyz ushý apparattaryna tyıymdy alyp tastaýǵa shaqyrdy

ASTANA. KAZINFORM — QHR Saýda mınıstrligi AQSh bıligin sheteldik ushqyshsyz ushý apparattary men olardyń quramdastaryn Amerıka naryǵyna satýǵa tyıym salý týraly sheshimin qaıta qaraýǵa shaqyrdy, dep habarlaıdy Kazinform menshikti tilshisi. 

Qytaılyq vedomstvo AQSh Federaldy baılanys komıssııasynyń (FCC) 22 jeltoqsanda ushqyshsyz ushý apparattary men shetelde jasalǵan negizgi komponentterdi ulttyq qaýipsizdikke qaýip tóndiretin tehnologııalar tizimine qosqan áreketterine narazylyq bildirdi. 

FCC qara tizimine ený ushqyshsyz ushý apparattary jańa úlgileriniń sertıfıkattalýyn buǵattaıdy. Onsyz sheteldik tehnıkany Qurama Shtattarǵa ımporttaý jáne zańdy túrde satý múmkin emes. 

Saýda mınıstrligi AQSh tarapy sońǵy jyldary qytaılyq jáne amerıkalyq kásiporyndar arasyndaǵy qalypty kommertsııalyq jáne saýda baılanystaryn, sondaı-aq eki eldegi ónerkásiptik toptardyń shuǵyl shaqyrýlaryn elemeı, ulttyq qaýipsizdik uǵymyn tym keń maǵynada túsindirip, qytaılyq fırmalardy qosa alǵanda, basqa elderdiń kompanııalaryn basý úshin memlekettik bılikti teris paıdalanǵanyn atap ótti.

— Mundaı áreketter naryqtyq qaǵıdattardyń tıptik burmalanýyn jáne býllıngtiń birjaqty tájirıbesin bildiredi, — dep atap ótti Qytaı Saýda mınıstrliginiń ókili.

Ol sondaı-aq eger AQSh óziniń qate baǵytyn jalǵastyra berse, Qytaı qytaılyq kompanııalardyń zańdy quqyqtary men múddelerin senimdi qorǵaý úshin barlyq qajetti sharalardy qabyldaıtynyn atap ótti.

Buǵan deıin Qytaıda dron operatorlary mamandyǵynyń tanymaldyǵy artyp keletinin jazǵan edik.