Qytaı AQSh-ty departament saıtyndaǵy Taıvanǵa qatysty qate málimetti túzetýge shaqyrdy

ASTANA. KAZINFORM — Bul týraly dúısenbide Qytaı Syrtqy ister mınıstrliginiń resmı ókili Go Tszıakýn málimdedi, dep habarlaıdy Sınhýa aqparat agenttigi. 

AQSh Memlekettik departamenti saıtyndaǵy Taıvan týraly aqparat paraǵynyń «jańartylýy» amerıkalyq taraptyń Qytaıdy shekteý úshin Taıvan máselesin paıdalanǵanynyń taǵy bir mysaly, osyǵan baılanysty Qytaı Qurama Shtattardy qatelerin dereý túzetýge shaqyrdy. 

Buǵan deıin AQSh Memlekettik departamenti óziniń saıtynda jarııalanǵan Taıvan týraly aqparat paraǵyn «jańartqany» — «AQSh Taıvan táýelsizdigin qoldamaıdy» degen burynǵy tujyrymdy alyp tastaǵany habarlanǵan bolatyn. 

Go Tszıakýn bir ǵana Qytaı baryn, Taıvan Qytaıdyń bir bóligi ekenin jáne Qytaı Halyq Respýblıkasynyń úkimeti — búkil Qytaıdy bildiretin jalǵyz zańdy úkimet ekenin qaıtalady. Dıplomattyń aıtýynsha, bul halyqaralyq qaýymdastyqtyń jalpy konsensýsy jáne halyqaralyq qatynastardyń jalpy tanylǵan normasy, ony AQSh-tyń úsh birlesken qytaı-amerıkan kommıýnıkesinde qabyldaǵan saltanatty mindettemesi rastaıdy.

Resmı ókil Memlekettik departamenttiń Taıvan týraly faktologııalyq anyqtamaǵa engizgen ózgertýi AQSh-tyń Taıvan máselesine qatysty ustanymynda eleýli keri qadam ekenin jáne «Taıvan táýelsizdigin» jaqtaıtyn separatıstik kúshterge óte qate sıgnal beretinin basa aıtty.

— Biz AQSh-ty óz qatelikterin dereý túzetýge jáne bir Qytaı prıntsıpi men úsh Qytaı-AQSh birlesken málimdemesin qatań saqtaýǵa shaqyramyz, — dedi Gýo Tszıakýn.

Ol AQSh tarapyn Qytaı men AQSh qarym-qatynastaryna, sondaı-aq Taıvan buǵazyndaǵy beıbitshilik pen turaqtylyqqa odan ári zııan keltirmeý úshin Taıvanmen naqty qarym-qatynas deńgeıin kóterýdi toqtatýǵa, Taıvanǵa halyqaralyq keńistigin keńeıtýge kómektesýden bas tartýǵa, «Taıvan qaýipsizdigin» qoldaýdy toqtatýǵa shaqyrdy.

Osyǵan deıin Qytaı AQSh-tyń Taıvanǵa qarý satýyn qatań aıyptaǵanyn jazdyq.