Qytaı AQSh taýarlaryna 50 paıyz qosymsha baj salyǵyn engizdi

ASTANA. KAZINFORM – AQSh-tyń Qytaıdan jetkiziletin taýarlarǵa salynatyn qosymsha baj salyǵynyń mólsherlemesin 104%-ǵa jetkizý týraly sheshimi 9 sáýir kúni túste kúshine engennen keıin, Qytaı bıligi qarymta shara qabyldady. Bul týraly Lianhe Zaobao  basylymy habarlady.  

Atap aıtqanda, 10 sáýir kúni 12:01–den bastap AQSh-tan ákelinetin barlyq taýarǵa taǵy da 50% qosymsha baj salyǵy engiziledi. Osylaısha, Qytaıdyń AQSh taýarlaryna engizgen baj salyǵynyń jalpy kólemi 84%-ǵa deıin ulǵaıady.

Qytaı Memlekettik keńesiniń janyndaǵy Kedendik tarıfter jónindegi komıssııa jarııalaǵan resmı habarlamada AQSh úkimetiniń 8 sáýirde Qytaıdan jetkiziletin taýarlarǵa salynatyn «ózara tarıfterdiń» mólsherin 34%-dan 84%-ǵa deıin kótergeni qadap aıtyldy. Qujatta AQSh-tyń baj salyǵyn arttyrýy «qaıtalanǵan qatelik» dep sıpattalyp, bul áreket «Qytaıdyń zańdy múddesin tabanǵa taptap, erejege negizdelgen kópjaqty saýda júıesine eleýli zııan keltirdi» dep atap kórsetildi.

Habarlama aıtylýynsha, Qytaı Memlekettik keńesiniń bekitýimen, 10 sáýir kúni saǵat 12:01–den bastap AQSh-tan ákelinetin ımporttyq taýarlarǵa salynatyn qosymsha baj salyǵynyń mólsherlemesi qaıta qaralyp, 34%-dan 84%-ǵa ósiriledi.

Eske sala keteıik, buǵan deıin AQSh-tyń Qytaıǵa qarsy 104% kóleminde baj salyǵyn qoldanysqa engizýine baılanysty Qytaı Syrtqy ister mınıstrligi resmı Beıjińniń óz múddesin qorǵaý úshin batyl ári pármendi sharalar qoldanýdy jalǵastyratynyn málimdegenin jazǵan bolatynbyz.