Qytaı AQSh kemelerine arnaıy porttyq alym engizedi
ASTANA. KAZINFORM — Qytaı 14 qazannan bastap AQSh-tyń áreketine jaýap retinde amerıkalyq kásiporyndarǵa, uıymdarǵa nemese jeke tulǵalarǵa tıesili ne solar basqaratyn kemelerge arnaıy porttyq alym engizedi, dep habarlaıdy QHR Kólik mınıstrligi.
Mınıstrliktiń málimdemesinde atap ótilgendeı, AQSh-tyń 14 qazannan bastap Qytaıda óndirilgen kemelerge porttyq alym engizý týraly sheshimi halyqaralyq saýdany retteıtin qaǵıdattardy jáne Qytaı men AQSh arasyndaǵy teńiz tasymaly jónindegi kelisimdi óreskel buzady, sondaı-aq eki el arasyndaǵy teńiz saýdasyna aıtarlyqtaı zııan keltiredi.
Osyǵan jaýap retinde Qytaı Halyq Respýblıkasy halyqaralyq teńiz tasymaly týraly erejelerge, ózge de zańnamalyq aktiler men halyqaralyq quqyqtyń negizgi qaǵıdattaryna súıene otyryp jáne QHR Memlekettik keńesiniń maquldaýymen 2025 jylǵy 14 qazannan bastap AQSh kompanııalary, uıymdary jáne 25%-dan joǵary úleske ıe azamattaryna tıesili, sondaı-aq AQSh-ta jasalǵan nemese AQSh týy astynda júzetin kemelerge arnaıy porttyq alym engizedi.
Bul alym árbir keme kirgende alynady jáne kezeń-kezeńimen engiziledi:
2025 jylǵy 14 qazannan bastap — 400 ıýan (shamamen 55 AQSh dollary) bir taza tonna úshin;
2026 jylǵy 17 sáýirden bastap — 640 ıýan;
2027 jylǵy 17 sáýirden bastap — 880 ıýan;
2028 jylǵy 17 sáýirden bastap — 1120 ıýan.
Alymdardy kemeler kiretin porttardaǵy teńiz ákimshilik organdary jınaıdy. Tólemniń resmı ataýy «arnaıy porttyq alym».
Buǵan deıin QHR tóraǵasy Sı Tszınpın AQSh-ty birjaqty saýda shekteýlerin engizýden bas tartýǵa shaqyrǵan bolatyn.