Qytaı AQSh qazynashylyǵyndaǵy oblıgatsııalaryn sońǵy 15 jyldaǵy eń tómengi mejege deıin qysqartty

ASTANA. KAZINFORM – Global Times basylymynyń málimetine súıensek, Qytaıdyń AQSh qazynashylyǵyndaǵy oblıgatsııalarynyń úlesi 760,1 mlrd dollarǵa deıin tómendep, 2009 jyldyń aqpanynan bergi eń tómengi deńgeıge tústi.

AQSh Qarjy mınıstrligi jarııalaǵan derekter Qytaıdyń AQSh qazynashylyǵyndaǵy oblıgatsııalary osy jyldyń qazan aıynda 11,9 mıllıard dollarǵa azaıyp, 760,1 mlrd dollardy quraǵanyn kórsetti. Bul 2024 jyly osymen tórtinshi márte azaıyp otyr. 

Global Times keltirgen málimetterge súıensek, 2022 jyldyń sáýirinen beri Qytaıdyń AQSh úkimetiniń syrtqy qaryzyna ınvestıtsııasy 1 trln dollardan az boldy. 

Memlekettik valıýtalyq baqylaý basqarmasynyń (SAFE) dereginshe, Qytaıdyń valıýtalyq qory 3,2659 trln dollardy qurady, bul qazan aıynyń sońyndaǵy kórsetkishten 4,8 mlrd dollarǵa (+ 0,15%) kóp. 

Qytaı Halyq bankiniń statıstıkalyq málimetterine sáıkes, qarasha aıynyń sońynda eldiń altyn qory - 72,96 mln ýntsııa, bul qazan aıymen salystyrǵanda 160 myń ýntsııaǵa artyq. 

Eske salsaq, osyǵan deıin Qazaqstan-Qytaı qarym-qatynasynyń damýy týraly monografııanyń tusaýy kesilgeni habarlanǵan.