Qytaı AQSh-qa salynatyn baj salyǵyn toqtatý merzimin 90 kúnge uzartady

ASTANA. KAZINFORM – Qytaı 12 tamyzdan bastap AQSh-tan ımporttalatyn taýarlarǵa qosymsha 24 paıyzdyq baj salyǵyn toqtata turýdy 90 kúnge uzartý týraly sheshim qabyldady. Bul rette qalǵan 10 paıyzdyq qosymsha tarıfterdi saqtaıdy, dep habarlaıdy Kazinform Sınhýa agenttigine silteme jasap.

Qytaı Memlekettik keńesiniń Kedendik tarıf komıssııasy Qytaı men AQSh arasyndaǵy qosymsha tarıfterdiń bir bóligin toqtata turý merzimin uzartý eki memleket basshylarynyń 5 maýsymdaǵy telefon kelissózderinde qol jetkizgen mańyzdy konsensýsty odan ári júzege asyrý qadamy ekenin atap ótti. 

Vedomstvo bul qadamnyń eki jaqtyń da damý maqsattaryna jetýdegi múddelerine saı jáne jahandyq ekonomıkanyń ósýi men turaqtylyǵyna yqpal etetinin qosty. 

Bir kún buryn, 11 tamyzda AQSh prezıdenti Donald Tramp ta Qytaıdan keletin taýarlarǵa baj salyǵyn engizýdi taǵy 90 kúnge shegerip, burynǵy kelisimniń merzimi aıaqtalýǵa sanaýly saǵattar qalǵanda tıisti buıryqqa qol qoıdy. 

Seısenbi kúni AQSh pen Qytaı shildeniń aıaǵynda Stokgolmde ótken saýda-ekonomıkalyq kelissózderden keıin birlesken málimdeme jasady. Qujatqa sáıkes, taraptar 2025 jyldyń 12 tamyzynan bastap qosymsha baj salyǵyn engizýdi 90 kúnge toqtatýǵa kelisti. 

Buǵan deıin Tramp Qytaıǵa qarsy baj salyǵyn 90 kúnge keıinge qaldyrǵanyn jazǵan edik.