Qytaı AI tehnologııasymen jabdyqtalǵan eki spýtnıkti orbıtaǵa shyǵardy
ASTANA. KAZINFORM — Qytaı Shandýn provıntsııasyndaǵy Haııan qalasy mańyndaǵy teńiz akvatorııasynda arnaıy kemeden Smart Dragon-3 zymyran-tasyǵyshyn sátti ushyryp, eki jasandy ıntellekti bar spýtnıkti orbıtaǵa shyǵardy, dep habarlaıdy Kazinform agenttiginiń Beıjińdegi menshikti tilshisi Xinhua agenttigine silteme jasap.
Ushyrý Beıjiń ýaqytymen saǵat 10:38-de Taııýan ǵarysh aılaǵynan basqaryldy. Zymyran Oriental Smart Eye 01 jáne Oriental Smart Eye 02 gıperspektrlik spýtnıkterin josparlanǵan orbıtaǵa jetkizdi.
Ár spýtnıktiń salmaǵy shamamen 300 kelini quraıdy, bul eýropalyq jáne amerıkalyq uqsas apparattardan bes ese jeńil. Olar shamamen 5 metrlik keńistiktik ajyratymdylyqty jáne 300 shaqyrymdyq asa keń qamtý jolaǵyn qamtamasyz etedi.
Eki apparat ta ónimdiligi 400 TOPS bolatyn borttyq jasandy ıntellekt esepteý modýlderimen jáne AI modelimen jabdyqtalǵan. Sonyń arqasynda gıperspektrlik derekterdi Jerge jibermeı-aq tikeleı orbıtada óńdeýge múmkindik bar.
Jergilikti BAQ-tyń málimetinshe, borttyq ǵaryshtyq esepteý tehnologııasy baılanys arnalarynyń ótkizý qabiletiniń tómendigi men derekterdi jetkizý kidirisi máselelerin azaıtyp, sý resýrstaryn, aýyl sharýashylyǵyn jáne paıdaly qazbalardy baqylaýdy jedeldetýge múmkindik beredi.
Bul Haııandaǵy Shyǵys ǵarysh aılaǵy úshin teńizden júzege asyrylǵan 27-shi sátti ushyrý boldy. Osy ýaqytqa deıin atalǵan alańnan orbıtaǵa shyǵarylǵan ǵarysh apparattarynyń jalpy sany 166-ǵa jetti.
Buǵan deıin Qytaı ınternet baılanysyna arnalǵan jańa spýtnıkter tobyn ǵaryshqa ushyrǵany habarlanǵan bolatyn.
