Qytaı AES qýaty boıynsha álemde birinshi orynǵa shyqty
ASTANA. KAZINFORM – Qytaıda jumys istep turǵan jáne salynyp jatqan atom elektr stantsııalarynyń jalpy sany 112-ge jetip, jıyntyq qýaty 125 GVt-ty qurady. Bul – álemdegi eń joǵary kórsetkish, dep habarlaıdy Kazinform tilshisi Beıjińnen jergilikti BAQ-qa silteme jasap.
Qytaıdyń ıadrolyq energetıkasyn damytý týraly 2026 jylǵy baıandamaǵa sáıkes, 14-besjyldyq (2021-2025 jyldar) kezeńinde el bıligi 46 jańa energobloktyń qurylysyn maquldaǵan. Qazirgi ýaqytta 60 energoblok paıdalanýǵa berilip, olardyń jıyntyq qýaty 63,69 GVt-ty quraıdy. Bul kórsetkish boıynsha Qytaı álemde úshinshi orynda tur.
– Qytaıda jumys istep turǵan jáne salynyp jatqan atom elektr stantsııalarynyń jıyntyq portfeli 112 nysanǵa jetip, olardyń jalpy qýaty 125 GVt-ty qurady. Bul kórsetkish eldi álemdik kóshbasshy deńgeıine shyǵardy, – delingen baıandamada.
15-besjyldyq (2026–2030 jyldar) aıasynda Beıjiń ártaraptandyrylǵan energetıkalyq júıeni jedel qalyptastyrýdy josparlap otyr. Bul júıede atom energetıkasy jańartylatyn energııa kózderimen qatar damıdy.
Qujatqa sáıkes, 2030 jylǵa qaraı jumys istep turǵan AES-terdiń qýatyn 110 GVt-qa jetkizý kózdelgen. Al 2040 jylǵa qaraı bul kórsetkish 200 GVt-qa deıin ulǵaıady.
– Salalyq strategııa atom energetıkasyn jaǵalaýdaǵy aımaqtarda damytý, shaǵyn modýldik reaktorlardy engizý jáne tórtinshi býyn tehnologııalaryn keńinen qoldanýdy kózdeıdi, – dep atap ótilgen qujatta.
Qytaı ıadrolyq energetıka qaýymdastyǵynyń tóraǵasy ıAn Chanlıdiń aıtýynsha, úshinshi býyndaǵy reaktorlarǵa arnalǵan jabdyqtardy jergiliktendirý deńgeıi 95%-dan asqan.
– Qazirgi ónerkásiptik áleýet jyl saıyn AES úshin negizgi jabdyqtardyń 10-nan astam tolyq jıyntyǵyn óndirýge múmkindik beredi. Bul bir mezgilde 50-ge deıin energobloktyń qurylysyn júrgizýge tehnıkalyq negiz qalyptastyrady, – dedi ol.
Onyń sózinshe, ıadrolyq energetıkany damytý memlekettik saıasattyń basym baǵyty bolyp qala beredi.
– Aldaǵy kezeńdegi negizgi mindetter – tolyq tehnologııalyq táýelsizdikke qol jetkizý, mańyzdy komponentter boıynsha ımportqa táýeldilikti joıý jáne ınnovatsııalyq óndiris tizbekterin qarjylyq kapıtalmen tereń yqpaldastyrý, – dedi ıAn Chanlı.
Aıta keteıik, Qytaıda álemdegi eń iri sýasty temirjol tonneli iske qosylýǵa jaqyn qaldy.
