Qytaı «adam tárizdi» JI-di retteýdi kúsheıtti
ASTANA. KAZINFORM – Internet keńistiginiń qytaılyq retteýshisi antropomorfty jasandy ıntellektige (JI) baqylaýdy kúsheıtetin erejeler jobasyn jarııalady. Qujatta ázirleýshilerden kámeletke tolmaǵandar arasynda tsıfrlyq táýeldiliktiń aldyn alý talap etiledi jáne qarttardy manıpýlıatsııalaý úshin týystarynyń daýystaryn ımıtatsııalaýǵa tyıym salynady, dep habarlaıdy Kazinform menshikti tilshisi.
«JI negizindegi antropomorfty ózara árekettesý qyzmetterin basqarýdyń ýaqytsha sharalary» jobasy vırtýaldy seriktester men emotsıonaldy chat-bottardyń tez damyp kele jatqan sektoryn retteýge baǵyttalǵan. Mundaı tehnologııalar halyqtyń áleýmettik oqshaýlanýynyń artýy aıasynda ásirese iri qalalarda keńinen tanymal boldy.
Qujatta turaqty psıhologııalyq táýeldilikti týdyrýǵa nemese paıdalanýshylardyń minez-qulyq jáne emotsıonaldyq reaktsııalaryna jasyryn áser etýge qabiletti JI modelderin jasaýǵa tikeleı tyıym salynady. Eger adam baǵdarlamamen eki saǵattan astam úzdiksiz árekettesse, júıe paıdalanýshyny májbúrli túrde úzilis jasaýǵa shaqyrýǵa mindetti bolady.
Jańa talaptar sonymen qatar qyzmet kórsetýshilerden klıentterge adammen emes, kompıýterlik baǵdarlamamen baılanysyp jatqanyn anyq habarlaýdy mindetteıdi. Bul ereje mátindik ınterfeısterge, sondaı-aq aýdıo jáne beıne qońyraýlarǵa qoldanylady. Sonymen qatar, kompanııalarǵa rastalǵan kelisimsiz zeınetkerlerdiń otbasy músheleriniń atyn jamylýǵa tyıym salynady.
Algorıtmder paıdalanýshydan sýıtsıd jasaý nıetin nemese ózine zııan keltirý qaýpin anyqtaǵan kezde erejeler jobasynda áńgimeni dereý adam operatorǵa tapsyrý buıyrylǵan. Mundaı jaǵdaılarda aqparattyq júıe paıdalanýshynyń tótenshe jaǵdaılardaǵy baılanys nómirlerine avtomatty túrde habarlaýy tıis.
Kámeletke tolmaǵandardyń múddelerin qorǵaý úshin mindetti mamandandyrylǵan kirý rejımi engizildi. Zańdy qamqorshylar hat almasý tarıhyn baqylaýǵa, JI belgili bir minez-qulyq stsenarıılerin buǵattaýǵa jáne qosymshalar ishindegi qarjylyq tranzaktsııalarǵa shekteý qoıýǵa ókilettik alady.
Qujat 2026 jyldyń 25 qańtaryna deıin qoǵamdyq talqylaý kezeńinde. Erejeler 2026 jyly kúshine enedi dep kútilip otyr.
Buǵan deıin Qytaı JI-diń negizgi salasyn damytýda boljamnan bes jylǵa ozyp ketkenin jazǵan edik.