Qytaı 9 jyldan keıin alǵash ret sýperkompıýterlerdiń álemdik reıtınginde kósh bastady
ASTANA.KAZINFORM — Qytaıdyń LineShine esepteý klasteri sheteldik balamalaryn basyp ozyp, turaqty ónimdiligi 2 eksaflopstan asqan álemdegi alǵashqy ortalyq protsessorǵa negizdelgen júıe atandy. Bul týraly Kazinform agenttiginiń Beıjińdegi menshikti tilshisi habarlady.
22–26 maýsym aralyǵynda Germanııanyń Gambýrg qalasynda ótip jatqan sýperkompıýterler jónindegi halyqaralyq konferentsııada jańartylǵan TOP500 jahandyq reıtıngi jarııalandy. Onyń jańa kóshbasshysy Qytaıdyń Shenchjen ulttyq sýperkompıýterlik ortalyǵy bazasynda iske qosylǵan LineShine sýperkompıýteri boldy.
Jańa júıe 2024 jyldyń sońynan beri reıtıngtiń birinshi ornynda turǵan amerıkalyq El Capitan keshenin ekinshi orynǵa yǵystyrdy. Osylaısha, Qytaı joǵary ónimdi esepteýler salasyndaǵy tehnologııalyq kóshbasshylyq mártebesin 2017 jyldan beri alǵash ret qaıtardy. Sol kezde reıtıngtiń kóshin Sunway TaihuLight bastap turǵan edi.
Qytaılyq júıe naqty ónimdilik boıynsha 2,19 eksaflops kórsetkishine qol jetkizdi. Nátıjesinde LineShine turaqty ónimdiligi 2 eksaflops sheginen asqan álemdegi alǵashqy sýperkompıýter atandy.
Shenchjen ulttyq sýperkompıýterlik ortalyǵynyń málimetinshe, jańa júıe tolyqtaı otandyq tehnologııalar negizinde jasalǵan. Qurylǵy Qytaıda ázirlengen LX2 protsessorymen jumys isteıdi. Sondaı-aq joǵary ótkizý qabilettiligi bar alǵashqy ulttyq jad júıesin (HBM) paıdalaný derekter almasý jyldamdyǵyn 10 esege arttyrýǵa múmkindik bergen.
Qazirgi ýaqytta LineShine esepteý qýaty Qytaı ekonomıkasynyń naqty sektorynda paıdalanylyp jatyr. Sýperkompıýter resýrstary aýqymdy tsıfrlyq egizderdi jasaýǵa, klımattyq ózgeristerdi joǵary dáldikpen modeldeýge, sondaı-aq materıaltaný, neıroǵylym, farmakologııa jáne irgeli zertteýler salalaryndaǵy ǵylymı jobalarǵa jumyldyrylǵan.
Eske salsaq, buǵan deıin eldegi sýperkompıýter qaı salalardaǵy máselelerdi sheshýge yqpal etetini týraly jazǵan edik.
