Qytaı 75 eldiń azamattary úshin vızasyz rejım engizdi

ASTANA. KAZINFORM — Qazirgi tańda Qytaı birjaqty tártipte nemese ózara kelisim negizinde 75 eldiń azamattary úshin vızasyz rejım engizdi, dep habarlaıdy Sınhýa.

Bul týraly eldiń vızalyq erejelerin ońtaılandyrý jáne halyqaralyq almasýlarǵa járdemdesý jónindegi kúsh-jigeri aıasynda Qytaı Halyq Respýblıkasynyń Kóshi-qon isteri jónindegi memlekettik basqarmasynyń bastyǵy Van Chjıchjýn baspasóz konferentsııasynda málim etti.

2021–2025 jyldarǵa arnalǵan 14-besjyldyq kezeń ishinde Qytaı arqyly vızasyz tranzıtke ruqsat etilgen elder sany da artty — olardyń sany 55-ke jetti. Elge kirýge bolatyn shekaralyq ótkizý beketteriniń sany 60-qa deıin ósti, olar 24 provıntsııany, avtonomııalyq aýdandar men ortalyqqa tikeleı baǵynatyn qalalardy qamtıdy, dep habarlady vedomstvo basshysy.

Sonymen qatar, vızasyz tranzıt merzimi 240 saǵatqa deıin uzartyldy. Van Chjıchjýnnyń aıtýynsha, bul sharalar Qytaıǵa týrıstik, iskerlik jáne ózge de maqsattarmen keletin sheteldikterdiń saparyn edáýir jeńildetti.

— Jeke tájirıbeleriniń negizinde kóptegen sheteldik qonaqtar qazirgi jáne kópqyrly Qytaı týraly túsinik qalyptastyrdy, — dedi ol.

Resmı derekterge sáıkes, 14-besjyldyq kezeń ishinde Qytaıdyń shekaralyq baqylaý organdary QHR aýmaǵyna kirý men shyǵýǵa 1,556 mıllıard ret ruqsat berip, ushaqtardy, kemelerdi, poıyzdar men avtokólikterdi qosa alǵanda, 98 mıllıonnan astam kólik quralyn tekserip ótkizgen.

— Qytaıdaǵy kedendik rásimdeý júıesi álemdegi eń tıimdi júıelerdiń birine aınaldy, — dep atap ótti Van Chjıchjýn.

Sondaı-aq ol Kóshi-qon isteri jónindegi basqarmanyń bilikti kadrlardy tartýǵa baǵyttalǵan neǵurlym belsendi, ashyq ári tıimdi strategııany júzege asyrýǵa kúsh salyp jatqanyn, sonymen qatar kirý vızalaryn, ýaqytsha turýǵa ruqsattardy, turýǵa yqtııarhattardy jáne basqa da ilespe qyzmetterdi qamtıtyn keshendi qoldaý júıesin qurýǵa járdemdesip jatqanyn atap ótti.

Budan buryn Almaty áýejaıy Qytaıdan jańa baǵyt boıynsha alǵashqy reısti qabyldaǵany belgili boldy.