Qytaı 500 iri jekemenshik kásiporynnyń reıtıngin jarııalady
ASTANA. KAZINFORM — Ótken jyldyń qorytyndysy boıynsha tizimdegi alǵashqy 110 kompanııanyń operatsııalyq kirisi 100 mlrd ıýannan (shamamen 14,82 mlrd dollar) asty. Bul eldiń jekemenshik sektorynyń turaqty ósip kele jatqanyn kórsetedi, dep habarlaıdy Sınhýa.
Qytaıdyń Búkilqytaılyq ónerkásipshiler jáne saýdagerler federatsııasy (BÓSF) Qytaıdyń soltústigindegi Tıantszın qalasynda jarııalaǵan reıtıngte alǵashqy úsh oryndy JD.com, Alibaba (China) Co., Ltd. jáne Hengli Group Co., Ltd. kompanııalary ıelendi.
Bul — BÓSF-nyń eldegi iri jekemenshik kásiporyndar arasynda júrgizgen 28-shi zertteýi. Bıyl zertteýge 2025 jyldyń qorytyndysy boıynsha árqaısysynyń operatsııalyq kirisi 1 mlrd ıýannan asatyn 6350 kásiporyn qatysty. Atalǵan reıtıng olardyń operatsııalyq kirisi týraly derekter negizinde jasaldy.
Zertteý nátıjesi kórsetkendeı, 2025 jyly Qytaıdyń jekemenshik kásiporyndary ınnovatsııalyq áleýetin, operatsııalyq tıimdiligin jáne negizgi básekege qabilettiligin arttyrýdy jalǵastyrǵan. Osylaısha, sektordyń jańa ári sapaly damý baǵytyna bet alǵany baıqalady.
2025 jyldyń qorytyndysy boıynsha Qytaıdaǵy 500 iri jekemenshik kásiporynnyń jıyntyq operatsııalyq kirisi 44,93 trln ıýanǵa jetip, bir jyl burynǵy kórsetkishten 4,35 paıyzǵa ósti. Olardyń jıyntyq taza paıdasy 1,83 trln ıýan boldy. Onyń ishinde 17 kásiporynnyń árqaısysy 20 mlrd ıýannan astam taza paıda tapqan.
Reıtıngke engen óńdeý ónerkásibi kásiporyndarynyń ótken jylǵy jıyntyq operatsııalyq kirisi 32,22 trln ıýandy qurady. Bul 2024 jylmen salystyrǵanda 8,73 paıyzǵa joǵary.
Eldegi 500 iri jekemenshik kásiporyn strategııalyq mańyzy bar jańa salalar men bolashaq ındýstrııalarǵa belsendi túrde ınvestıtsııa salyp jatyr. Tıisti derekterdi usynǵan kompanııalardyń ishinde 311 kásiporyn strategııalyq mańyzy bar jańa salalardaǵy 679 jobany iske asyrýǵa qarjy bólgen. Al 82 kásiporyn bolashaq ındýstrııalarǵa qatysty 112 jobany iske qosqan.
Innovatsııa salasynda da iri kásiporyndardyń belsendiligi joǵary. Tıisti málimetterdi usynǵan 500 kompanııanyń ǵylymı-zertteý jáne tájirıbelik-konstrýktorlyq jumystarǵa (ǴZTKJ) jumsaǵan jalpy shyǵyny 1,26 trln ıýandy qurady. Bul rette ǴZTKJ-ǵa salynǵan ınvestıtsııanyń ortasha úlesi kásiporyndardyń kirisiniń 2,95 paıyzyna teń boldy.
Sonymen qatar eldegi 500 iri jekemenshik kásiporynnyń ótken jyly tólegen salyqtarynyń jalpy kólemi 1,3 trln ıýandy qurady.
Budan buryn Qytaı orbıtada ósimdiktiń 14 túrine jatatyn 20-dan astam surypty ósirgenin jazǵanbyz.
