Qytaı 5 myń metrge jýyq tereńdikte burǵylaý rekordyn ornatty
ASTANA. KAZINFORM — Qytaıdyń «Mensıan» muhıttyq burǵylaý kemesi Ońtústik Qytaı teńizinde shamamen 5 myń metr tereńdikke deıin burǵylap, eldiń ulttyq rekordyn jańartty, dep habarlaıdy Sınhýa.
Qytaıdyń Tabıǵı resýrstar mınıstrliginiń málimetinshe, ekspedıtsııa barysynda zertteýshiler muhıt túbindegi tereń shuńǵymadan bazalt úlgilerin aldy.
Qytaıda ázirlengen burǵylaý qondyrǵysynyń kómegimen uzyndyǵy 4,27 metr bolatyn bazalt úlgisi shyǵaryldy. Agenttik málimetinshe, Qytaı muhıttyq burǵylaý kemesiniń kómegimen tereń muhıt basseınindegi qatty taý jynystarynyń úlgilerin alǵan AQSh pen Japonııadan keıingi úshinshi el atandy.
Zertteý jumystaryna tereńsýly qashyqtan basqarylatyn apparattar da tartyldy. Eki apparat shamamen 4 myń metr tereńdikte jalpy 358 saǵattan astam jumys istegen.
Alynǵan úlgiler men jınalǵan derekter Ońtústik Qytaı teńiziniń qalyptasýy men keńeıýin, ejelgi teńiz ortasynyń evolıýtsııasyn zertteýge, sondaı-aq asa tereń sýlardaǵy energetıkalyq resýrstardy barlaýǵa jáne ıgerýge paıdalanylmaq.
Ekspedıtsııaǵa toǵyz ǵylymı-zertteý mekemesinen 170 zertteýshi qatysty.
«Mensıan» muhıttyq burǵylaý kemesi Qytaıda 2024 jyly paıdalanýǵa berilgen.
Buǵan deıin Qytaı orbıtada ósimdiktiń 14 túrine jatatyn 20-dan astam surypty ósirip jatqany týraly habarladyq. Qytaı ǵaryshkerlerin daıarlaý ǵylymı-zertteý ortalyǵy bul jetistikti ǵarysh stantsııasynda ósimdikterdi aýqymdy kólemde ósirýge negiz qalaıtyn mańyzdy kezeń dep baǵalady.
