Qytaı 31 tamyz ben 1 qyrkúıek aralyǵynda ShYU sammıtin ótkizedi

ASTANA. KAZINFORM — 20-dan asa eldiń kóshbasshylary jáne 10 halyqaralyq uıymnyń basshylary Qytaıdyń Tıantszın qalasynda ótetin Shanhaı Yntymaqtastyq Uıymynyń (ShYU) sammıti men oǵan baılanysty sharalarǵa qatysady, dep habarlaıdy Sınhýa.

Bul týraly seısenbi kúni QHR Syrtqy ister mınıstri Van I málimdedi.

QHR Syrtqy ister mınıstri jáne QHR Ortalyq Komıtetiniń Saıası bıýrosynyń múshesi Van I ShYU Bas hatshysy Nurlan Ermekbaevpen birge Tıantszınde ótken birlesken baspasóz konferentsııasynda Tıantszındegi ShYU sammıtiniń 31 tamyzdan 1 qyrkúıekke deıin ótetinin habarlady.

Sondaı-aq sol kúni Van I Tıantszınde ShYU múshe memleketterdiń Syrtqy ister mınıstrleriniń Keńesi otyrysyna tóraǵalyq etti.

Otyrysqa Qazaqstannyń vıtse-premeri, Syrtqy ister mınıstri Murat Nurtileý, Pákistannyń vıtse-premeri, Syrtqy ister mınıstri Muhammad Ishaq Dar, Belarýstiń Syrtqy ister mınıstri Maksım Ryjenkov, Úndistannyń Syrtqy ister mınıstri Sýbramanıam Djaıshankar, Irannyń Syrtqy ister mınıstri Abbas Aragchı, Qyrǵyzstannyń Syrtqy ister mınıstri Jeenbek Qýlýbaev, Reseıdiń Syrtqy ister mınıstri Sergeı Lavrov, Tájikstannyń Syrtqy ister mınıstri Sırodjıddın Mýhrıddın, Ózbekstannyń Syrtqy ister mınıstri Bahtıer Saıdov, ShYU Bas hatshysy Nurlan Ermekbaev jáne ShYU Aımaqtyq antıterrorıstik qurylymynyń Atqarýshy komıtetiniń dırektory Ularbek Sharsheev qatysty.

Van I ShYU múshe memleketterin uıymdy nyǵaıtý máselelerinde keń kelisimge umtylýǵa shaqyryp, tarıh pen bolashaq aldyndaǵy jaýapkershilikti kórsetý kerektigin basa aıtty. Qytaılyq dıplomat ShYU-ny damytýǵa bes usynys jasady.

Ol múshe memleketter bastapqy maqsattarynan taımaı, «shanhaı rýhyn» nasıhattap, qaýipsizdiktiń negizin kúsheıtip, ózara tıimdilikke jetýge, damý qozǵaltqyshyn yntalandyrýǵa, dostyq pen kórshilik qarym-qatynasty nyǵaıtýǵa, sondaı-aq adaldyq pen ádildikti qoldaýǵa tıis ekenin atap ótti.

Van I Qytaıdyń ShYU-ǵa tóraǵalyq etý barysyndaǵy jumysyna rızashylyǵyn bildirip, uıymnyń birlesken kúsh-jigeri arqyly jańa sapaly damý kezeńine ótetinine senim artty.

Otyrysqa qatysýshylar Qytaıdyń tóraǵalyq etken kezeńdegi eleýli jumystaryn joǵary baǵalap, Tıantszındegi sammıttiń tabysty ótýi úshin qytaı tarapymen úılesimdilik pen yntymaqtastyqty jalǵastyrýǵa daıyn ekenderin aıtty.

Budan buryn habarlanǵandaı, Erevan Shanhaı yntymaqtastyq uıymyna múshe bolýǵa qyzyǵýshylyq bildirdi.