Qytaı 30 jylda alǵash ret «Túrmeler týraly» zańdy aýqymdy túrde jańartty
ASTANA. KAZINFORM — Qytaıdyń joǵarǵy zań shyǵarýshy organy «Túrmeler týraly» zańnyń jańa redaktsııasyn qabyldady, dep habarlaıdy Kazinform agenttiginiń Beıjińdegi menshikti tilshisi Sınhýa agenttigine silteme jasap.
Reforma sottalǵandardy qaıta áleýmettendirý júıesin jetildirýge jáne qylmystyq-atqarý mekemelerin basqarý tıimdiligin arttyrýǵa baǵyttalǵan.
Atalǵan túzetýler sońǵy 30 jyldaǵy osy saladaǵy zańnamanyń alǵashqy aýqymdy qaıta qaralýy boldy. Jańartylǵan redaktsııada baptar sany 78-den 121-ge deıin ulǵaıtylǵan.
Qujatta úkimderdiń oryndalýyna prokýrorlyq qadaǵalaýdy kúsheıtý jáne túrmelerdi ákimshilik basqarýdyń neǵurlym naqty standarttaryn engizý qarastyrylǵan.
Sondaı-aq zań sottalǵandardyń zańdy quqyqtary men múddelerin qorǵaý normalaryn bekitedi. Sottar, prokýratýra organdary men túzeý mekemeleri ákimshilikteriniń jumysyna erekshe nazar aýdarylǵan.
Olarǵa jazany jeńildetý jáne shartty túrde merziminen buryn bosatý týraly isterdi qatań zań talaptaryna sáıkes, ýaqtyly ári beıtarap qaraý mindeti júkteledi.
Qytaıdyń ádilet mınıstri He Jýn reformanyń qajettiligi qoǵamdaǵy ádildik, zań ústemdigi jáne qaýipsizdikke degen suranystyń artýymen baılanysty ekenin atap ótti.
Onyń aıtýynsha, sot jáne quqyq qorǵaý júıesin josparly túrde jetildirý túrme júıesiniń jumysyna jańa talaptar qoıyp otyr.
Zań jobasyn talqylaý barysynda depýtattar quqyqtyq bazany keńeıtýge Qytaıdaǵy qoldanbaly psıhologııa salasynyń damýy yqpal etkenin aıtty.
Bul baǵytta bilikti mamandar sanynyń artýy psıhologııalyq kómek pen túzetý baǵdarlamalaryn zańǵa engizýge múmkindik bergen.
Jańartylǵan «Túrmeler týraly» zań 2026 jylǵy 1 qarashadan bastap kúshine enedi.
Osyǵan deıin Qytaıdyń kıberqaýipsizdik týraly zańdy jańartyp jatqany habarlanǵan bolatyn.
