Qytaı 2035 jylǵa deıin kómirtek shyǵaryndylaryn 7–10%-ǵa qysqartpaq

ASTANA. KAZINFORM – Kómirtek shyǵaryndylary boıynsha álemdegi eń iri el – Qytaı 2035 jylǵa qaraı olardy 7–10 paıyzǵa qysqartpaq. 

AZÁRTADJ habarlaýynsha, bul týraly Qytaı Halyq Respýblıkasynyń tóraǵasy Sı Tszınpın Nıý-Iorkte ótken klımat sammıtinde beınebaılanys arqyly málimdedi.

Ekonomıka aýqymynda shyǵaryndylardy qysqartý maqsatymen qatar, Sı Tszınpın aldaǵy 10 jyl ishinde Qytaıda jel jáne kún energetıkasynyń qýatyn 2020 jylǵy deńgeıden alty eseden astam arttyrý josparlanǵanyn aıtty. Sonymen birge el ishindegi energııa tutynýdaǵy beıtarap (qazbaǵa jatpaıtyn) otyn úlesin 30 paıyzdan asyrý kózdelip otyr.

Pekınden tikeleı beıneúndeý jasaǵan Sı Tszınpın ekologııalyq taza kólikterdi jappaı qoljetimdi etýdi jáne «klımatqa beıimdelgen qoǵamdy qurýdy» ýáde etti.

Qazirgi tańda álemdik kómirqyshqyl gazy shyǵaryndylarynyń 31 paıyzdan astamy Qytaıǵa tıesili.

Sonymen birge Sı Tszınpın damyǵan elderdi klımattyń ózgerýimen kúreste belsendi áreket etýge shaqyrdy.

— Jasyl ári tómen kómirtekti transformatsııa — bul zamanaýı úrdis. Keıbir elder bul úrdiske qarsy áreket etip jatqanyna qaramastan, halyqaralyq qaýymdastyq durys baǵyttan taımaı, berik senimin saqtap, tabandy qadam jasap, kúsh-jigerin báseńdetpeýi tıis, — dedi Sı Tszınpın jahandyq klımat salasyndaǵy yntymaqtastyqty keńeıtýge úndeı otyryp. 

Aıta ketelik Gýterrısh klımattyq ádilettilikti tańdaýǵa shaqyrǵan edi.