Qytaı 2030 jylǵa qaraı shaı ındýstrııasyn 1,5 trln ıýanǵa jetkizýdi kózdeıdi

ASTANA. KAZINFORM — Qytaıda senbi kúni shaı ındýstrııasyn jańǵyrtýdy ilgeriletýge arnalǵan nusqaýlyq jarııalandy. Qujatqa sáıkes, 2030 jylǵa qaraı salalyq tizbektiń jalpy kólemi 1,5 trln ıýanǵa (shamamen 216 mlrd AQSh dollary) jetýi tıis, dep habarlaıdy Sınhýa.

Qujatty Qytaı Halyq Respýblıkasynyń Ónerkásip jáne aqparattyq tehnologııalar mınıstrligi jáne taǵy tórt memlekettik vedomstvo birlesip ázirlegen. Negizgi maqsat — shaı salasynyń sapasy men tıimdiligin aıtarlyqtaı arttyrý.

Josparǵa sáıkes, 2030 jylǵa qaraı sala turaqty qamtamasyz etilgen, ekologııalyq taza, zııatkerlik tehnologııalarǵa negizdelgen jáne halyqaralyq naryqta básekege qabiletti bolýy qajet.

Al 2028 jylǵa deıin negizgi shaı óndirýshi óńirler turaqty ósim qarqynyn saqtaı otyryp, óndiris sapasy men tıimdiligin arttyrýda jańa nátıjeler kórsetýi tıis. Bul óz kezeginde salalyq tizbekti jańǵyrtý deńgeıin edáýir kóterýge, ónim túrlerin jáne tutyný baǵyttaryn keńeıtýge múmkindik beredi.

Qoıylǵan maqsattarǵa jetý úshin qujatta birqatar negizgi mindet aıqyndalǵan. Atap aıtqanda, ǵylymı-tehnıkalyq ınnovatsııalardy damytý, naryq sýbektilerin qoldaý jáne mamandandyrylǵan ónerkásiptik klasterler qurý kózdelip otyr. Sondaı-aq, shaı shıkizaty men quramdastaryn turmystyq taýarlar, hımııa ónimderi, kosmetıka jáne densaýlyq saqtaý salalarynda keńinen paıdalaný josparlanǵan.

Qytaı shaıdyń otany retinde tanymal. Myńdaǵan jyldar boıy shaı qytaı mádenıetiniń ajyramas bóligine aınalyp, halyqtyń kúndelikti ómirinde erekshe oryn alyp keledi.

Buǵan deıin birqatar shaıdyń quramynan tyıym salynǵan zattar tabylyp, satylymnan alynyp tastalǵany belgili boldy.