Qytaı 2030 jylǵa qaraı munaı men gaz óndirisin 440 mln tonnaǵa jetkizýdi kózdep otyr
ASTANA. KAZINFORM — Qytaı munaı men gaz salasyn damytýdyń jańa besjyldyq jospary aıasynda 2030 jylǵa qaraı jalpy óndiris kólemin 440 mıllıon tonnaǵa jetkizýdi josparlap otyr, dep habarlaıdy Kazinform agenttiginiń Beıjińdegi menshikti tilshisi Xinhua-ǵa silteme jasap.
QHR Ulttyq energetıka basqarmasy men Damý jáne reformalar isi jónindegi memlekettik komıtet birlese daıyndaǵan qujat eldiń 2026–2030 jyldarǵa arnalǵan otyn-energetıkalyq keshenin damytýdyń negizgi baǵyttaryn aıqyndaıdy.
Shıkizatty tasymaldaý kólemi jyldan-jylǵa artyp kele jatyr, sol úshin Beıjiń taǵy da 20 myń shaqyrym magıstarldyq munaı-gaz qubyrlaryn salýdy kózdep otyr. Osylaısha, qazirgi onjyldyq mejeniń sońyna qaraı ulttyq qubyr jelisiniń jalpy uzyndyǵy 220 myń shaqyrymǵa jetpek.
— Munaı men gaz — ónerkásiptik shıkizat pen energııanyń negizgi kózi, al olardy jetkizý energetıkalyq qaýipsizdikpen, ulttyq ekonomıkanyń jáne QHR halqynyń ál-aýqatynyń damýymen tyǵyz baılanysty, — delingen qujatta.
Jospar boıynsha, suıytylǵan tabıǵı gaz termınalynyń syıymdylyǵyn jylyna 200 mln tonnaǵa deıin, al qurlyqpen ótetin qubyrlar arqyly gazdy ımporttaý kólemin jylyna 114 mıllıard tekshe metrge deıin jetkizý qarastyrylyp otyr.
Munaı-gaz óndirý negizinen Ordos, Bohaı, Sychýan, Tarım, Sýnlıao, Jońǵar jáne Tsaıdam munaı-gaz basseınderindegi strategııalyq óndiristik bazalarda júrmek.
Buǵan deıin Qytaıdaǵy kómirsýtek óniminiń jıyntyq kólemi 2025 jyly tarıhı 420 mln tonna munaı ekvıvalentine jetkeni habarlanǵan bolatyn.
Raıhan Rahmetova
